Хавай муж улсын Мауй арал дээр дэгдсэн асар хүчтэй салхинаас үүдэлтэй түймрийн улмаас амиа алдсан хүний тоо нэмэгдсээр 36-д хүрсэн тухай холбогдох албаны хүмүүс мэдэгдлээ. Салхины хүч хэдийгээр буурсан ч Дора хар салхины улмаас олон зуун барилга байшин нурж, зарим нь түймэрт шатсаар байгаа аж. Олон мянган хүнийг нүүлгэн шилжүүлж, онц байдал зарлажээ.
Эрэн хайх, аврах ажиллагаа явагдаж байгаа бөгөөд зарим хүмүүс сураггүй хэвээр байна.
Муж улсын захирагчийн орлогч Сильвиа Люк сэтгүүлчдэд хэлэхдээ "Бидний энэ гарз хохиролоос гарах зам урт, удаан байх болно” гэжээ.
Тэрээр үргэлжлүүлэн "Гал түймэрт нутгийн ардууд, мөн энэ аралд хөрөнгө оруулалт хийсэн жижиг бизнесүүд, жижиг дунд үйлдвэрлэл ихээр өртлөө. Бид ирэх жилүүдийн турш олон хүмүүст туслах арга замуудыг эрж хайх хэрэгтэй байна" гэж хэлсэн юм.
"Гал түймэр унтраах ажиллагаа үргэлжилсээр байгаа бөгөөд одоогийн байдлаар Лахайна хотын түймрийн улмаас амиа алдсан 36 хүний цогцсыг илрүүлээд байна" гэж Мауи арлын захиргаа мэдэгдлээ.
Мауйд нээгдсэн таван хоргодох байр бүгд хүмүүсээр дүүрсэн байна.
CNN
°C