PUBGM тоглоомын Дэлхийн Аварга Шалгаруулах Тэмцээн (ДАШТ) Турк улсад зохион байгуулагдлаа. Тус тэмцээний "Grand final"-д манай улсаас "4Merical vibes", "Stalwart esports", "IHC esports" гэсэн гурван баг оролцсон юм. Финалын шатны 3 өдрийн тоглолтын нийт үр дүнгээр "IHC" баг дэлхийн аваргын цомыг хүртжээ. Тэдний хувьд тэмцээний Group Stage, Survival Stage, Last Chance гэх бүх шатанд амжилттай оролцож финалын шатанд гарч ирсэн юм.
IHC esports баг 18 тоглолтын дараах байдлаар 142 оноо авч ДАШТ-д түрүүллээ. Ингэснээр 453,500 ам.долларын шагнал хүртэж байна. Харин "Stalwart esports" баг 138 оноотойгоор хоёрдугаар байр эзэлж 263,000 ам.доллар, "4Merical vibes" баг дөрөвдүгээр байр эзэлснээр 144,000 ам.долларын шагнал хүртлээ. 3 сая ам.долларын шагналын сантай PUBG MOBILE и спортын дэлхийн аваргын цомын төлөөх тэмцээнд Монголын багууд амжилттай оролцож 1, 2, 4 дүгээр байр эзэлсэн байна.
Энэ жилийн PUBGM тоглоомын ДАШТ-д манай улсаас анх удаа гурван баг оролцож байгаа. 2020 оны анхны дэлхийн аваргад "zeusesports" буюу одоогийн "IHC esports" баг гуравдугаар байрт шалгарч байсан билээ. Ийнхүү тус тоглоомын төрлөөр ДАШТ түрүүлсэн анхны Монгол баг болж байна. Мөн шилдэг тоглогчоор Zyol буюу Б.Золбоот тодорлоо.
Тэрбээр дэлхийн аваргын цомыг авсан сэтгэгдлээ "Энэ хүртэл манай баг амаргүй замыг туулсан. Багаараа маш их бахархаж байна. Биднийг үргэлж дэмжиж байсан дэмжигчдэдээ маш их баярлалаа" хэмээн хуваалцлаа.
°C