Санхүүгийн үзүүлэлтүүд нь таамгаас давсан ч Нью-Йоркийн хөрөнгийн биржийн арилжаагаар компанийн хувьцааны ханш 4.6 хувиар буурлаа
“Netflix” компани 2024 оны эхний улиралд шинээр 9.33 сая хэрэглэгчтэй болсноо пүрэв гарагт хийсэн мэдэгдэлдээ дурдлаа. Энэ нь шинжээчдийн таамаглаж байсан 4.84 саяас бараг хоёр дахин өссөн үзүүлэлт юм. Дэлхийн өнцөг булан бүрд “Netflix”-ийн хэрэглэгчдийн тоо өссөн бөгөөд АНУ, Канадад хамгийн олон хэрэглэгч нэмэгдсэн байна.
Хэрэглэгчид ийнхүү олширсон нь компанид борлуулалт болон орлогын төсөөллөө давуулан биелүүлэхэд дэмжлэг болов. I улиралд тус компани 9.37 тэрбум ам.долларын орлоготой ажилласан нь шинжээчдийн таамагласан 9.26 тэрбум ам.доллароос давлаа.
Санхүүгийн үзүүлэлтүүд нь хэдийгээр таамгаас давсан ч Нью-Йоркийн хөрөнгийн биржийн арилжаагаар компанийн хувьцааны ханш 4.6 хувиар буурав. Гэхдээ он гарснаас хойш хувьцааны ханш нь 25 хувиар өсөөд байгаа. “S&P 500” индексийн хамгийн өндөр өсөлттэй хувьцаануудын нэгд тооцогдож байна.
Үүнтэй зэрэгцээд өрсөлдөгч “Amazon” компанийн “Prime” үйлчилгээний хэрэглэгчийн тоо III сард 180 сая буюу шинэ дээд цэгтээ хүрч, өмнөх оны мөн үеэсээ 8 хувиар өсөв.
“Amazon”-ийн “Prime” үйлчилгээнд хөнгөлөлттэй захиалга хүргэлт болон “Prime video streaming”-ийн үйлчилгээ багтдаг. Хэрэглэгчид сард 15 ам.доллар, жилд 140 ам.доллар төлж энэхүү үйлчилгээг авдаг байна. “Prime” үйлчилгээний хэрэглэгчдийн тоо өссөн нь “Walmart” болон “TikTok shop”, “Shein”, “Temu” зэрэг БНХАУ-ын компаниудын онлайн өрсөлдөөн ихсэж байгаа энэ үед “Amazon” хүчтэй өрсөлдөгч хэвээр байгааг харуулж буй.
“Amazon”-ийн хувьд олон төрлийн бараа бүтээгдэхүүнийг хурдан шуурхай хүргэдэг нь гол давуу тал болж байна гэж зах зээлийн шинжээчид дүгнэсэн. “Amazon”-ийн “Prime” хэрэглэгчдийн тоо цар тахлын дараа огцом өөрчлөлтгүй байсан ч хамгийн сүүлийн байдлаар АНУ-ын хэрэглэгчдийн 75 хувь нь энэ үйлчилгээнд бүртгэлтэй гэсэн тооцоог танилцуулсан байна.
°C