Архангай аймгийн төв Цэцэрлэг хотод 22 МВт-ын хүчин чадалтай дулааны цахилгаан станцын бүтээн байгуулалтын ажил эхэлжээ. Тус станцыг төр, хувийн хэвшлийн түншлэлийн хүрээнд барьж, 2028 онд ашиглалтад оруулахаар төлөвлөсөн байна. Төслийн хүрээнд төрөөс станцын дэд бүтэц болох шугам сүлжээнд 80 орчим тэрбум төгрөг, хувийн хэвшлээс станцын бүтээн байгуулалтад 150 орчим тэрбум төгрөгийн хөрөнгө оруулалт хийх юм. Ингэснээр төслийн нийт өртөг 230 орчим тэрбум төгрөг болох аж. Шинэ станц ашиглалтад орсноор жилд дунджаар 138.6 сая кВт.ц цахилгаан, 67,130 Гкал дулааны эрчим хүч үйлдвэрлэх боломж бүрдэнэ. Улмаар айл өрх, сургууль, цэцэрлэг, эмнэлэг болон бусад байгууллагыг цахилгаан, дулаанаар найдвартай хангахад хувь нэмэр оруулах юм. Мөн станцын үйл ажиллагаатай холбоотойгоор инженер, техникийн чиглэлээр 90 байнгын ажлын байр шинээр бий болгохоор төлөвлөжээ.Цэцэрлэг хотын эрчим хүчний найдвартай хангамжийг нэмэгдүүлэх нь орон сууцжилт, үйлдвэрлэл, үйлчилгээний салбарын хөгжил, орон нутгийн эдийн засгийн өсөлтийг дэмжих ач холбогдолтой юм. Төслийг “Эй Пи Пи Энержи” ХХК, “Энержи Девелопмент” ХХК болон хөрөнгө оруулагчид хамтран хэрэгжүүлж байна.
Эх сурвалж: Архангай аймгийн ИТХ
°C