2022 оны арванхоёрдугаар сарын 31-нд оройн 22:50 минутанд Баянзүрх дүүргийн харьяа 26 настай бүсгүй төрөх эмнэлэг хүлээж аваагүйн улмаас "Өргөө" амаржих газрын үүдэнд машиндаа амаржжээ. Энэ талаар тухайн эхийн нөхөр олон нийтийн цахим сүлжээнд мэдээлэл оруулсан юм. Тэрбээр "Эмнэлгийн гадаа машиндаа төрлөө. Гурван удаа эмнэлэг рүү орлоо. Үнэхээр хэцүү санагдаж байна гэж" тухайн үеийн бухимдлаа илэрхийллээ.
Харин энэ талаар "Өргөө" амаржих газар төрөлжсөн мэргэшлийн эмнэлгийн Эмчилгээ эрхэлсэн дэд захирал Ц.Алтантуяагаас тодрууллаа. Тэрээр “Баянзүрх дүүргийн иргэн 26 настай хоёр дахь төрөлт байсан. Нөхрийнхөө хамт хувийн машинаар төрөх эмнэлэг дээр ирсэн боловч буруу хаалган дээр очиж зогсоод үйлчилгээ авахыг хүссэн. Машинаа төв зам дагуу байрлуулсан байсан учир манайхаас хоёр эмч очиж, үзлэг хийхэд төрөх үйл явц аль хэдийн эхэлсэн байсан. Тиймээс хүүхдийг машинд төрүүлсэн. Харин эхэс гардуулах үйл ажиллагааг эмнэлэгт буюу ариун орчинд үргэлжлүүлэн хийсэн. Одоо эх хүүхдийн биеийн байдал хэвийн. Тусгай тасагт нөхөртэйгөө цуг байгаа. Тэрнээс биш харьяаллын бус хэмээн буцаасан зүйл огт байхгүй. Энэ үйл явдал 2022 оны 12 дугаар сарын 31-ний өдрийн 22:00 цагийн орчимд болсон ” гэлээ.
°C