Монголын бурхан шашны салбарт эмэгтэйчүүдийн оролцоог нэмэгдүүлэх, энэ талын бодлогыг хангахад Нархажид сүм үеийн үед тодорхой үүргийг гүйцэтгэсээр ирсэн. 1991 оноос хойш тасралтгүй үйл ажиллагаа явуулж байгаа тус сүм өнгөрсөн жилүүдэд хоёр удаа боловсон хүчин, хүний нөөцөө чадавхжуулах сургалт, хөтөлбөрийг амжилттай зохион байгуулж байсан бол энэ жил гуравдахь удаагийн элсэлтээ зарлаад байна.
Нархажид сүмийн хамт олон хийгээд Зүүн хүрээ коллежийн багш, сурган хүмүүжүүлэгчид 10 дугаар сар 10-17-ны өдрүүдэд Нийслэлийн таван дүүрэгт суралцахыг хүссэн 18-25 насны эмэгтэйчүүдийг бүртгэх ажлаа явуулах аж.
Сургалт их, дээд сургуулийн хичээлийн программын дагуу явагдах ба 1.6 жил суралцаад ажлын байр, дотуур байраар хангагдах бүрэн боломжтой.
Мөн сургалтын төлбөр 100 хувь үнэ төлбөргүй, сар болгон цалин зэдтэй гээд хөтөлбөрийн онцлог, давуу тал олон бий. Мэргэжлийн багш, мэргэжилтнүүд хичээлийг заах ба суралцагчид Шашин судлал, Эх хэл судлал, Гүн ухаан, бясалгал, Энэтхэг санскрит, Төвөд, Англи хэлний орчуулагчаар мэргэжил эзэмшиж, цаашлаад хүссэн чиглэлээрээ мэргэших боломжтой гэдгийг сургалтыг зохион байгуулагчид онцолж байлаа.
Сургалт, хөтөлбөрөө танилцуулах, оюутнуудаа элсүүлэх ажил өнөөдөр /2022.10.10/ СХД-ийн Иргэдийн хурлын танхимд зохион байгуулагдсан бол ирэх Лхагва гарагт БЗД-ийн Иргэний танхимд 11:00-14:00 ээлжит танилцуулгаа хийх нь ээ.
°C