Иргэд гадаад паспортоо захиалахдаа шаардлага хангасан цээж зургаа авахуулан Улсын бүртгэлийн ажилтан дээр очиж материалаа бүрдүүлж өгдөг байсан. Харин 14 хоногийн өмнөөс үүнийг болиулж, улсын бүртгэлийн ажилтан өөрөө иргэдийн зургийг авч чанарын шаардлага хангасаныг нь сүлжээнд оруулан иргэдийн паспортны захиалгыг хийдэг болсон.
Тэгвэл улсын энэ үйлчилгээ иргэдэд чирэгдэл учруулан бухимдуулж байна. Учир нь өмнө иргэд бэлдсэн материалаа Улсын бүртгэлийн ажилтанд шалгуулаад өгөөд гарахад 3-5 минут зарцуулдаг байсан бол бүртгэлийн ажилтан зураг авч эхэлсэнээр нэг хүнд 20-25 минут зарцуулж байгаа аж.
Сүүлийн өдрүүдэд нийслэлийн нэгдсэн үйлчилгээний цэгийн гадаад паспорт захиалах хэсэгт урт дараалал үүсэж, иргэд зөвхөн зураг авахуулах үйлчилгээнээс болж цаг хугацаагаа дэмий дугаарлан өнгөрөөж байна.
Өмнө өөрсдөө авахуулаад ирдэг байсан нь дээр байж хэмээн бухимдаж байна. Улсын бүртгэлийнхэн өөрсдөө зураг авдаг болсоноо тайлбарлахдаа иргэдийн халааснаас гардаг байсан 5000 төгрөгийн хэмнэхээс гадна дундын зуучлал, хуурамч паспорт хувилахаас сэрэмжилж байгаа хэмээж буй.
°C