Монгол Улсын Засгийн газрын олборлолтоос үйлдвэрлэл рүү шилжих бодлогын хүрээнд “Эрдэнэс Монгол” нэгдэл газрын тос боловсруулах үйлдвэр, гангийн үйлдвэр, зэс хайлуулах үйлдвэр, нүүрс пиролизын үйлдвэр зэрэг томоохон төслүүдийг хэрэгжүүлж байна. Эдгээр төслийн хүрээнд шаардлагатай инженер, техникийн мэргэжилтнүүдийг бэлтгэх зорилгоор “Эрдэнэс Монгол” нэгдэл МУИС, ШУТИС, Монгол-Германы хамтарсан ашигт малтмал, технологийн их сургуультай хамтран ажиллах санамж бичиг байгууллаа.
Санамж бичгийн хүрээнд талууд уул уурхайн салбарын хүний нөөцийг бэлтгэх, инженер, техникийн мэргэжилтнүүдийг үйлдвэрлэлийн бодит хэрэгцээнд тулгуурлан сургах, судалгаа, инновац, инженерчлэлийн хамтын ажиллагааг өргөжүүлэх чиглэлээр хамтран ажиллана.
“Эрдэнэс Монгол” нэгдлийн Гүйцэтгэх захирал Б.Даваадалай “Олборлолтоос боловсруулалт руу шилжиж, нэмүү өртөг шингэсэн үйлдвэрлэлийг хөгжүүлэхийн тулд инженер, техникийн мэргэжилтнүүдээ өнөөдрөөс бэлтгэх шаардлагатай” гэдгийг онцолж, санамж бичгийн хэрэгжилтийг төлөвлөгөөний дагуу шуурхай эхлүүлэхийг тэмдэглэлээ.
Судалгаагаар “Эрдэнэс Монгол” нэгдлийн харьяа компаниудад ойрын гурван жилд 147 нарийн мэргэжлийн 4 мянга орчим инженер, мэргэжилтэн шаардлагатай байгаа бол цаашид үйлдвэр, технологийн паркуудын хүрээнд 10,800 орчим шинэ ажлын байр бий болох төлөвтэй байна.
°C