Сүүлийн жилүүдэд баавгайн халдлага нийгмийн анхаарлын төвд байна. Баавгайн тоо толгой хамгийн ихтэй бүсүүдийн нэг болох Японы хойд хэсэгт орших Акита мужийн их сургууль энэ оны эхээр "Баавгайн эсрэг технологийн шийдэл" уралдаан зарлажээ. Уралдаанд нийт 41 бүтээл ирснээс хамгийн ирээдүйтэй санаануудыг энэ сарын 13-нд танилцуулсан байна. Тэдгээрийн нэг нь "Хаччан" нэртэй, баавгай үргээх зориулалттай робот нохой юм. Энэхүү роботын нэрийг Японы хамгийн алдартай Акита үүлдрийн нохой Хачико-гоос санаа авчээ. Хаччан нь уламжлалт анчдын ойд ашигладаг Акита анчны нохойноос санаа авсан ч жинхэнэ анчны нохойноос ялгаатай нь амьтанд гэм хор учруулах бус, зөвхөн үргээх зорилготой.
Уг роботыг тариалангийн талбай, суурьшлын бүсийн зах хэсгүүдэд байрлуулах бөгөөд камер нь баавгай илрүүлмэгц чанга хуцах, дуу гарган амьтныг ой руу буцаан үргээх аж. Мөн байршлын мэдээллээ бусад роботтой хуваалцаж, нэмэлт робот нохдыг дуудан цуглуулснаар хамгаалалтын бүлэг үүсгэх боломжтой.
Түүнчлэн тус робот нохойнууд баавгайн байршил, зан төлөвийн мэдээллийн сан бүрдүүлж, суурьшлын бүсийн зах хэсэгт бие даан эргүүл хийх чадвартай байхаар төлөвлөжээ.
Төслийг удирдаж буй Акита мужийн их сургуулийн Бүсийн хамтын ажиллагаа, судалгааг дэмжих төвийн судлаач Масаюки Ёшида робот нохдыг энэ оныг дуусахаас өмнө бодит орчинд туршиж эхлэхээр зорьж буйгаа мэдэгдлээ.
°C