Эдийн засаг, хөгжлийн яамны Төрийн нарийн бичгийн дарга И.Батхүү 2025 оны 08 дугаар сарын 04-ний өдөр Оманы Хөрөнгө оруулалтын газрын ерөнхийлөгч ноён Абдулсалам Аль-Муршиди тэргүүтэй төлөөлөгчдийг хүлээн авч уулзлаа.
Уулзалтаар Монгол Улсын эдийн засгийн нөхцөл байдал, худалдаа, хөрөнгө оруулалтын орчны тухай танилцуулж, Оманы Хөрөнгө оруулалтын газар (ОХОГ)-тай хамтран ажиллах боломжтой чиглэл, арга хэмжээний талаар санал солилцлоо.
ОХОГ-аас Монгол Улсын ашигт малтмал, тэр дотроо газрын тос, газ, хүнсний аюулгүй байдлыг хангах хүрээнд мах экспортлох боломжуудын талаар судалж, хамтран ажиллах хүсэлтэй байгаагаа илэрхийлсэн ба Монголын талаас эдгээр салбараас гадна сэргээгдэх эрчим хүчний чиглэлээр хамтран ажиллах боломжтойг дурдсан юм. Мөн хоёр улсын хооронд худалдааны тээвэр, логистикийн асуудлыг шийдвэрлэх, хөнгөвчлөх чиглэлээр хамтын ажиллагааг бэхжүүлэх талаар хэлэлцэв.
Түүнчлэн, Монгол Улс болон Оман Улсын хамтарсан хөрөнгө оруулалтын сан байгуулах боломжийг хэлэлцэж, энэ чиглэлээр цаашид судалгаа хийх, хамтран ажиллах талаар тохиролцлоо.
Оманы Хөрөнгө оруулалтын газар нь тус улсын үндэсний баялгийн сан бөгөөд газрын тос, байгалийн хийн орлогоос бүрдсэн санхүүгийн эх үүсвэрийг зохистой удирдах, хөрөнгө оруулалт хийх үндсэн үүрэгтэй байгууллага юм.
°C