НХХ-ийн сайд Д.Сарангэрэл зүй бус үг хэлж, иргэд олон нийтийг доромжилсон хариуцлагагүй үйлдлээсээ болж сайдын суудлаасаа буугаад байгаа. Түүний оронд одоогоор ЗГХЭГ-ын сайд Д.Амарбаясгалан түр үүрэг гүйцэтгэж байна.
Д.Сарангэрэл гишүүний тухайд Ерөнхийлөгчийн гуйлтаар Л.Оюун-Эрдэнийн танхимд орж ирсэн таван сайдын нэг болоод байв. Тэгэхээр танхим дахь нэг квотоо алдсан Ерөнхийлөгч, Ерөнхий сайдад дахин нэг сайдын суудал тулгах уу гэдэг таамаг улстөрийн орчинд тархжээ.
Нөгөөтэйгүүр иргэд, олон нийтэд ч НХХЯ-нд хэн сайдаар очих вэ гэдэг их л сонин байгаа бололтой юм.
Ямартай ч одоогоор түүний оронд хэд хэдэн эмэгтэй гишүүдийн нэрс яригдаж байна. Харин эл мэдээлэлд эхнээсээ няцаалт өгчээ.
Тухайлбал, УИХ-ын гишүүн Б.Баярсайхан цахим хуудсаараа дамжуулж "Сайд болохыг хүсэж байгаа хүмүүс нь мөрөөрөө ажлаа хөөцөлдөнө үү!!!. Намайг дунд нь харлуулж зохион байгуулалттай нүдэхээ зогсооно уу, хаанаас, хэнээс гэдэг нь мэдэгдээд байна. Дарга сайд болох гээд энэ тэрүүгээр гүйгээд байдаг хүн биш гэдгээ албан ёсоор хэлье" хэмээв.
Тэгвэл өнөөдөр УИХ-ын гишүүн Х.Булгантуяа “Булгантуяа сайд болох гээд байна гэж Засгийн газар өөрчлөгдөх бүрт л бичих юм. Болоосой гэж чин сэтгэлээсээ дэмжсэн бүх хүмүүст баярлалаа. Мөнгө тарааж сошиалыг давалгаалуулаад байсан зүйл байхгүй. Бат Инженер, Бидний цөөхөн монголчуудын М.Зоригт нар ч миний мөнгөөр жиргээд, бичээд байдаг хүмүүс биш. Манай нам дотор тэгэж байгаад сайд болчихдог амархан юм ч байхгүй. Надаасаа мөнгөтэй нь тэгвэл давалгаалуулаад сайд болчихдог юм байгаа биз дээ” гэжээ.
°C