Монгол Улсын Ерөнхийлөгч У.Хүрэлсүхийн санаачлан боловсруулсан Монгол Улсын Их Хурлын тухай хуульд нэмэлт, өөрчлөлт оруулах тухай, УИХ-ын гишүүнийг эгүүлэн татах хуулийн төслийг хэлэлцэхийг Төрийн байгуулалтын байнгын хороо 66.7 хувиар дэмжсэн. Ингээд Пүрэв гарагийн чуулганы хуралдаан дээр энэ хуулийн хэлэлцүүлэг өрнөсөн ч үр дүнд хүрэлгүй хойшлогдлоо. 126 гишүүнээс 107 нь ирцээ бүртгүүлэн эхлүүлсэн ч хэлэлцүүлгийн явцад 30 хүрэхгүй гишүүн үлдсэнээр санал хураалтыг Баасан гарагийн хуралдаан хүртэл хойшлууллаа. Хэлэлцүүлгийн үеэр асуулт асууж, үг хэлсэн гишүүд болон хуулийн ажлын хэсэг, Ерөнхийлөгчийн Тамгын газрын төлөөлөл хоорондын байр суурь, уур амьсгал ширүүн байлаа.
Хэдийгээр Ерөнхийлөгч хууль санаачлах эрхтэй ч парламентын дотоод бүрэн эрхэд шууд нөлөөлөх зохицуулалт оруулах нь эрх мэдлийн тэнцвэрт байдалд сөргөөр нөлөөлнө гэдгийг зарим гишүүд хэлж байлаа. Мөн энэхүү хуулийн төсөл парламентын хариуцлагыг нэмэгдүүлэх сайн талтай ч, нөгөө талдаа эрх мэдлийн заагийг бүдгэрүүлэх, тодорхой бус заалтаар улс төрийн хэрэгсэл болгох, парламентын бие даасан байдлыг сулруулах эрсдэл дагуулж болзошгүйг гишүүд мөн тодотголоо. Тиймээс уг хуулийг яаран батлахаас илүүтэй Үндсэн хуулийн зарчим, ардчиллын тэнцвэрт байдалд нийцүүлэн сайжруулах шаардлагатайг хэлсэн юм.
°C