УИХ-аар 2023 оны төсөв хэлэлцүүлж байгаатай холбогдуулан “Төсөв 2023” олон нийтийн хэлэлцүүлгийг анх удаа зохион байгуулах гэж байна. Энэ талаар УИХ-ын гишүүн, Төсвийн байнгын хорооны дарга Г.Тэмүүлэн мэдээлэл өгөв.
Тэрбээр “2023 оны төсвийн төслийн дөнгөж нэгдүгээр хэлэлцүүлэг үргэлжилж байна. Төсөв энэ намрын чуулганаар хэлэлцэгдэн батлагдах ёстой. Төсвийн тухайд хэд хэдэн онцлогтой байна.
2022 оны төсөв цар тахлын хүндрэлийг даван туулах, эрсдлийг бууруулахад чиглэсэн байсан бол 2023 оны төсөв эдийн засгийг тогтворжуулах, тэр дундаа тодорхой шинэчлэлтүүдийг урагшлуулж, өргөн барьсанаараа онцлог боллоо. Цалингийн тогтолцоонд шинэчлэл оруулж ирж байна.
Төсвийн байнгын хорооны хувьд энэ жил хаалганы цаана төсвийг хэлэлцэн баталдаг жишгийг өөрчилнө. Цаашдаа олон нийтээрээ төсвийг хэлэлцдэг, хяналт тавьдаг шинэ жишигт суурилсан хэлэлцүүлгийг зохион байгуулаад явна. Энэхүү олон нийтийн нээлттэй хэлэлцүүлэг 10 дугаар сарын 19-нд болно.
Төсөв бол нэг талдаа татвар төлөгчдийн мөнгө. Тэгэхээр төсвийг хэрхэн оновчтой, зөв зарцуулах дээр ард түмэн хяналт тавих эрхтэй. Хэлэлцүүлгээр иргэн бүр төсөвтэй холбоотой санал гомдлоо хэлж, өөрсдөө оролцох бүрэн боломжтой болж байна.
Үр ашиггүй урсгал зардал, хөрөнгө оруулалтуудаас эхлээд халамжийн бодлогын төсөв дээр жил бүр шүүмжлэл өрнөдөг. Тэгэхээр энэ болгон дээр хамтаараа, олон нийтээрээ оролцож, зөвшилцөж, гарц шийдлээ илэрхийлэх боломжтой болж байгаа юм. Ингэж байж төсвийн хяналт, сахилга бат, ил тод байдал сайжирна" хэмээв.
°C