Улаанбаатар хотын Налайх дүүргийн нутаг Тайж хайрхан уулын бэлд гурван өдрийн турш үргэлжилсэн “Нүүдэлчин” дэлхийн соёлын фестивальд нийслэл болон 21 аймгийн 990 өвлөн уламжлагч хуран чуулж, соёлын биет бус өвийн долоон ай савд багтах 362 төрөл зүйлийн өвийг олон нийтэд сурталчлан таниулжээ. Энэ үеэр фестивалийн шилдгүүдийг тодруулжээ. “Нүүдэлчин” дэлхийн соёлын фестивалийн тэргүүн байрыг Дундговь аймгийн өвлөн уламжлагчид эзэлж, 30 сая төгрөгөөр шагнууллаа. Дундговь аймаг энэ жилийн фестивальд “Загийн ус” сэдвээр оролцсон байна. Мөн соёлын биет бус өвийг хамгаалах, түгээн дэлгэрүүлэх үйл хэрэгт үнэтэй хувь нэмэр оруулсан шилдэг өвлөн уламжлагчдыг долоон ай савын хүрээнд тодруулж, нийт 21 хүнд шагнал гардуулжээ. Түүнчлэн хамгийн өндөр настай зургаан өвлөн уламжлагч, хамгийн бяцхан өвлөн суралцагч зургаан хүүхдийг алдаршуулан шагнасан юм.
°C