Хөгжлийн банкны Хянан шалгах түр хорооны даргаар УИХ-ын гишүүн Ж.Сүхбаатар ажиллаж байсан ч Монгол Улсын сайд, Улаанбаатар хотын авто замын түгжрэлийг бууруулах үндэсний хорооны даргаар томилогдсон тул түр хорооны ажлаа хүлээлгэн өгчээ. Харин түүний оронд УИХ-ын гишүүн Б.Энхбаярыг томилжээ. Хөгжлийн банкны хянан шалгах түр хороонд Д.Батлут, Э.Батшугар, Б.Бат-Эрдэнэ, Ж.Бат-Эрдэнэ, Л.Мөнхбаатар, Ц.Мөнхцэцэг,Ж.Сүхбаатар, Б.Энхбаяр, Ж.Батсуурь, Н.Ганибал, Т.Доржханд нар байдаг.
Хөгжлийн банкны зээлийн эргэн төлөлтийн асуудал нийгэмд шуугиан дэгдээж шүүмжлэл дагуулсны дараа Хөгжлийн банкны асуудлыг УИХ хяналтдаа авч өнгөрсөн оны 4 дүгээр сард “Хянан шалгах түр хороо байгуулах тухай” тогтоолыг баталсан билээ. Тэгвэл энэ хугацаанд Хөгжлийн банкны чанаргүй зээлийн өргөн төлөлт өнгөрсөн онуудаас эрс өссөнийг өчигдөр хийсэн цаг үеийн мэдээллийн үеэр Хөгжлийн банкны Тэргүүн дэд захирлын үүрэг гүйцэтгэгч Ж.Батаа онцоллоо. Тэрбээр мэдээлэл хийх үеэрээ Хөгжлийн банканд 2022 оны 01 дүгээр сарын 20-ны өдрөөс хойш 769.4 тэрбум төгрөгийн зээлийн эргэн төлөлт хийгдсэн. Үүний 87 хувийг бэлэн мөнгөөр, 13 хувийг өмчлөлийн бус үл хөдлөх хөрөнгөөр эргэн төлсөн гэдгийг хэллээ. Нийт бэлэн мөнгөөр төлөгдсөн зээлийн 267.1 тэрбум нь хэвийн, 126.4 тэрбум нь анхаарал хандуулах, 278.3 тэрбум нь чанаргүй зээлийн ангилалд хамрагдаж байсан аж.
°C