Монгол Улсын Ерөнхий сайд Л.Оюун-Эрдэнэ Холбооны Бүгд Найрамдах Герман Улсын Канцлер Олаф Шольцын урилгаар тус улсад албан ёсны айлчлал хийж байгаа билээ. Айлчлалын хүрээнд Ерөнхий сайд болон түүнийг дагалдан яваа албаны хүмүүс тус улсад ажиллаж, амьдардаг монгол иргэдтэй уулзаж санал хүсэлтийг нь сонслоо.
Энэ үеэр Ерөнхий сайд Л.Оюун-Эрдэнэ МИАТ-ийн Улаанбаатар-Берлин чиглэлийн нислэгтэй холбоотой асуудалд товч тайлбар хийв. Учир нь түүнийг Улаанбаатар-Франкфурт чиглэлийн нислэгийг Берлинд буулгасан хэмээн нэр бүхий иргэн шүүмжлээд байгаа юм.
Тэрбээр "Бид МИАТ-ийн онгоцоор ирэхдээ шүүмжлэлд өртсөн. Уг нь 800 орчим сая төгрөгийн зардлыг 40 сая төгрөг болгож хэмнэсэн юм. Бид мэдээлэлдээ ойлголтын зөрүү гаргасан. Гэхдээ иргэдийн хандлага зөв учраас энэ бол бухимдах зүйл биш. Яагаад гэвэл чартер нислэгээр ирдэг байсан соёлыг энгийн байдлаар зохицуулдаг болж байна" хэмээв.
Түүний айлчлал ийнхүү үргэлжилж байна. Өчигдөр Ерөнхий сайд Л.Оюун-Эрдэнэ Германы эрх баригч Социал демократ намын дарга Ларс Клингбайлтай уулзаж, олон улсын нөхцөл байдал, эрх баригч улс төрийн намуудын үйл ажиллагаа, хоёр орны хамтын ажиллагааны талаар ярилцсан. Үүний дараа бүтээгдэхүүнээ Германд борлуулж буй “Говь” үйлдвэрийн дэлгүүрт очиж үйл ажиллагаатай нь танилцлаа.
°C