УИХ-ын Аюулгүй байдал, гадаад бодлогын байнгын хорооны хуралдаан болж , Монгол Улсын Ерөнхийлөгчөөс 2022.10.26-ны өдөр өргөн мэдүүлсэн Зэвсэгт хүчний жанжин штабын даргыг томилох саналыг зөвшилцөх тухай асуудлыг хэлэлцлээ.
Улмаар Зэвсэгт хүчний жанжин штабын даргаар С.Ганбямбыг томилох саналын томъёоллоор санал хураахад нийт 17 гишүүн оролцсоноос 14 нь дэмжиж, 85.7 хувийн саналаар ЗХЖШ-ын даргаар С.Ганбямбыг томилохыг дэмжлээ. Байнгын хорооны санал дүгнэлтийг УИХ-ын чуулганы нэгдсэн хуралдаанд танилцуулах юм.
Санал хураалтын өмнө байнгын хорооны гишүүд Зэвсэгт хүчний жанжин штабын даргад нэр дэвшигч, генерал С.Ганбямбаас асуулт асууж, хариулт авсан юм.
Энэ үеэр УИХ-ын гишүүн Д.Ганбат “Тайван цагт цэргийн албанд эрүүл хүүхдийг үзлэгт оруулж авч яваад, шарил буцааж өгч байна. Энэ асуудлаа тайлбарлаж өгөөч. Би нэг жил цэргийн албанд суралцах бага хугацаа гэж боддог. Гэтэл одоогоор хугацаат цэргүүдийг хамаг хар ажлаа хийлгэдэг хүн болгож хараад байх юм. Ингэснээр баячуудын хүүхдүүд алба хаахаа больсон. УИХ-ын 76 гишүүнд надаас өөр цэргийн алба хаасан хүн байхгүй. Эрүүл саруул хүүхдийг цогцос болгож өгөхдөө эцэг, эхчүүдэд нь юу гэж хэлдэг вэ?” хэмээн нэр дэвшигч С.Ганбямбаас асуув.
Зэвсэгт хүчний Жанжин штабын Нэгдүгээр орлогч дарга, Бригадын генерал С.Ганбямба түүнд “Хариуцлагагүй албан тушаалтны хариуцлагагүй үйлдлээс болж цэргүүд хохирч байна. Энэ тал дээр тодорхой арга хэмжээ авч хэрэгжүүлэхээр хэлэлцэж байна” гэдэг хариулт өглөө.
°C