Улсын Их Хурлын Эдийн засгийн байнгын хорооноос 2022 оны 12 дугаар сарын 21-нд “Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах” ерөнхий хяналтын сонсголыг зохион байгуулсан. Оролцогчдын зүгээс УИХ-ын Тамгын газрын зохион байгуулалтад дургүйцлээ илэрхийлж нээлттэй сонсголыг олон танхимд хуваагдаж биш нэг танхимд сууж иргэдийн оролцоог хангах ёстой гэдэг шаардлагыг тавьсан. Тэгвэл олон нийтийн сүлжээнд Ардчилсан намын бүлгээс зохион байгуулж хэлэлцүүлгийг тараах сонирхолтой байна гэдэг мэдээлэл гарч эхэлсэн. Үүнтэй холбогдуулан УИХ дахь Ардчилсан намын бүлгээс өнөөдөр дараах мэдэгдлийг хийлээ.
УИХ дахь Ардчилсан намын бүлгээс 2022 оны 12 дугаар сарын 15-ны өдөр Монгол Улсын Их хурлын дарга Г.Занданшатарт хандан шаардлага хүргүүлсэн.
Уг шаардлагад: “Монгол Улсын Их Хурлын Эдийн засгийн байнгын хорооноос зохион байгуулах гэж буй “Нүүрсний олборлолт, тээвэрлэлт, экспорттой холбоотой Ерөнхий хяналтын сонсгол”-д дараах асуудлыг оруулах шаардлагатай гэж Улсын Их Хурал дахь Ардчилсан намын бүлгийн зүгээс үзэж байна. Үүнд:
1. Ерөнхий хяналтын сонсголыг төрийн ордонд онцгой хамгаалалтанд бус иргэдийнхээ төлөөллийг хангалттай түвшинд оруулах боломжоор хангаж, нийслэлийн өмчит “Соёлын төв өргөө”-нд зохион байгуулах;
2. Энгийн иргэд, жагсагчдын төлөөллөөс 1.000 хүн оролцуулах;
3. Иргэдэд асуулт асууж, хариулт авах боломжийг нээлттэй олгох, сонсголд цагийн хязгаар тогтоохгүй байх;
4. Монголын Үндэсний Олон Нийтийн Радио телевиз болон бусад мэдээллийн сувгуудаар ямар нэгэн цензургүйгээр шууд дамжуулах нөхцөлөөр хангахыг тус тус шаардаж байна.
Ерөнхий хяналтын сонсголд дээрх асуудлыг оруулснаар нүүрс тойрсон олон асуудлуудыг ил болгох, буруутай этгээдүүдэд хариуцлага тооцох, ард иргэдийн нийтлэг эрх ашгийг хангуулах, иргэдийн оролцоог бүрэн хангахад чухал ач холбогдолтой гэж үзэж байна.
Хувийг: Ерөнхий хяналтын сонсгол зохион байгуулах үүрэг бүхий ажлын хэсгийн ахлагч,Улсын Их Хурлын гишүүн Г.Ганболд, Ерөнхий хяналтын сонсголын даргалагч, Улсын Их Хурлын гишүүн С.Чинзориг нарт “ гэв.
УИХ дахь Ардчилсан намын бүлэг нээлттэй сонсголд олон нийтийн оролцоог тэгш хангахыг шаардсаар ирсэн болно хэмээн мэдэгдлээ.
°C