Монголын Хөрөнгийн бирж IPO гаргахад бэлэн болсон талаар Хөрөнгийн биржийн захирал Х.Алтай мэдээлэл хийлээ. Тэрбээр “Төрийн өмчит компаниудыг түүчээлж, Монголын Хөрөнгийн бирж хувьцаа гаргах Засгийн газрын шийдвэр гарсан. Энэ шийдвэрийн дагуу Хөрөнгийн бирж хувьцаа гаргах бэлтгэл ажлаа хангаж, СЗХ-ноос зөвшөөрлөө авсан. Дараа долоо хоногийн даваа гаригт цан цохино. Монгол Улсад сүүлийн жилүүдэд хөрөнгийн зах зээл эрчимтэй хөгжиж байна. Зах зээлийн гол байгууллага болох Хөрөнгийн бирж төрийн өмчөөс олон нийтийн өмчит шилжих нь олон улсын жишигт нийцнэ гэв.
Мөн Монголын хөрөнгийн бирж хувьцаа гаргах болсонтой холбоотойгоор Засгийн газрын хэрэг эрхлэх газрын дарга Д.Амарбаясгалан мэдээлэл хийлээ.
Тэрбээр ”Төрийн өмчийн бүртгэлтэй 110 гаруй компанийн 34 хувь буюу хяналтын багцийг олон нийтэд шилжүүлнэ. Амжилттай болсны дараа үлдсэн 66 хувийг олон нийтэд шилжүүлэх ажил эхэлнэ. “Төр бол сайн менежер байж чадахгүй байна. Төрийн өмчийн аж ахуй нэгж өөрийнхөө үүргийг бүрэн дүүрэн биелүүлж чадахгүй байна” гэдэг шүүмжлэлийг ард түмэн өгч ирсэн. Тэгвэл Засгийн газар Хөрөнгийн биржийг олон нийтийн өмчит болгох ажлыг эхлүүлж байна. 2023 он бол төрийн өмчийг олон нийтийн хяналтад эрчимтэй шилжүүлсэн он болно” гэлээ.
°C