Улстөрийн орчин дахь “нууц тамга” гэж хэлж болох Ж.Алдаржавхланг яг ингэж тэсрэх болов уу гэж учир мэдэх хүмүүс мэдэж л байсан байх.Түүний өнөөдрийн ярих өнцөг олон хүнийг чихийг онгойлгож, нэгийг бодогдуулсан биз ээ. Ингэж хэллээ гээд юу ч болвол болог гэсэн шийдчихсэн өнгө аястай харагдаж байгаа хэдий ч энэ талаар дуугарах нэг ч болов хүн байгаад баяртай байна.
Үнэхээр л түүний хэлснээр, Нийслэл, дүүргийн Иргэдийн төлөөлөгчдийн хурлын төлөөлөгч гэж хэн юм бэ? Юу хийдэг хүн бэ? гэдэг асуултыг өнөөдрийг болтол иргэд, олон нийт, сонгогчид асуусаар ирсэн. Гэтэл ИТХ-ын төлөөлөгч болох гэж тухайн хүн баахан хичээл зүтгэл, хөрөнгө мөнгө гаргаж, амлалт өгдөг. Харин гарч ирээд өчүүхэн ч эрх мэдэл байдаггүй. Зөвхөн тэдний улстөрийн дараагийн нүүдлийн суурь гэлтэй явдаг.
Төлөөлөгчдийн хийдэг ажлын ихэнх нь санал, эсрэгээрээ гуйлга. Товчхондоо, эрх мэдэл нь хүрэхгүй учир иргэдээс хэлж байгаа асуудлуудыг ярайтал нь шийдэж чадахгүй. Зөвхөн холбогдох эрх бүхий хүнд уламжилна. Ж.Алдаржавхлан хэлсэндээ ч биш олон асуудлыг шийдэх гол хүн бол Нийслэлийн Засаг дарга, түүний эрх хэмжээ. Гэтэл НИТХ, дүүргийн ИТХ гэж нүсэр бүтэц байсаар...
Энэ бүхнээс болж бодит амьдрал дээр дүүргийн ИТХ-ын төлөөлөгч, хорооны засаг дарга нар зөвхөн хүмүүсийн зовлонг сонсож, аргадаж суудаг хүн болж хувирсан гэж ч тэр үнэн хэлжээ.
Харин үүний гаргалгаа, засаг захиргааны шинэчилсэн хуваарилалтыг хийж, Нийслэлийн ИТХ, Дүүргийн ИТХ гэдэг ижил үүрэг, зорилготой давхардсан бүтцийг нэгтгэж, хөрөнгө зардлаа хэмнэх гэдгийг ч онцолж.
Ингэж хэлснээрээ тэр өнөөдөр адаглаад хэдэн төлөөлөгчдийнхөө дайсан болж хувирна. Гэхдээ яг энэ асуудлыг Үндсэн хуулийн нэмэлт өөрчлөлт, Сонгуулийн хууль гээд холбогдох хуулийн төсөлдөө заавал тусгаж, өөрчлөлт хийх хэрэгтэй.
“Анхан шатанд УЛС ТӨРИЙН ХЭНЭЭТЭЙ, ХООСОН АМБИЦТАЙ ЗАЛУУСЫГ ОЛНООР НЬ ҮЙЛДВЭРЛЭЖ, БОЙЖУУЛЖ БАЙГАА НИЙСЛЭЛИЙН БОЛОН ДҮҮРГИЙН ИТХ-ЫН СОНГУУЛИЙН АЛЬ НЭГИЙГ НЬ ХҮЧИНГҮЙ БОЛГОХ ЦАГ НЬ БОЛСОН” гэх Ж.Алдаржавхлангийн үгээр эл асуудлын дүгнэлтийг уншигч танд үлдээе.
°C