УБТЗ-ын Тээвэр зохицуулалтын албаны орлогч дарга С.Батдөлийг цагдан хорих эсэхийг өнөөдөр Баянгол дүүргийн шүүхэд хэлэлцэж, түүнийг нэг сар цагдан хорих шийдвэр гаргасан. Цагдан хорих эсэхийг шийдэх шүүх хурлын үеэр С.Батдөл нь "Би 3-13 насны 4 хүүхэдтэй. Эхнэр эмнэлэгт хэвтсэн. Хүүхэд харах хүнгүй учраас цагдан хоригдмооргүй байна. Би хөнгөн гэмт хэрэг үйлдсэн... Хорихгүйгээр шийдэх боломжтой, Ард түмэн намайг сошиалаар яллаж байна. Миний охин 13 настай. Сүүлийн 4 өдөр бүлцийтлээ уйллаа. Охиныхоо сэтгэл зүйд маш их санаа зовж байна. Ангийнхан нь хүүхдүүд группуудээсээ хассан байна лээ" хэмээн ярьжээ.
Хэргийг эргэн сануулахад, УБТЗ-ын Тээвэр зохион байгуулалтын албаны орлогч даргa С.Батдөлийн гэр, түүний хамаарал бүхий этгээдийн объектоос долоон тэрбум төгрөг бэлнээр, 3 тэрбум төгрөгийн үл хөдлөх хөрөнгийн гэрчилгээ хураан авсан нь өнгөрсөн долоо хоногт олон нийтийн анхаарлын төвд байсан.
Түүнийг 48 цагийн хугацаатай цагдан хорьсон ч бямба гарагт сулласан нь иргэдийн шүүмлэлийн бай болсон. Улмаар прокурорын байгууллагаас түүнийг нэг сар цагдан хорих саналыг шүүхэд хүргүүлээд байсан билээ. Ингээд түүнийг нэг сар цагдан хорихоор боллоо.
°C