Ардчилсан намын Үндэсний Бодлогын Хороо өнөөдөр хуралдаж буй. Энэ үеэр УИХ-ын гишүүн асан Л.Гүндалай АН-ын даргад нэрээ дэвшүүлэхээ илэрхийлж мэдээлэл хийлээ. Тэрбээр хэлэхдээ "Намын даргаа сонгох журмаа өнөөдрийн хурлаас батална гэж ойлгосон. Миний хувьд АН-ын даргад нэрээ дэвшүүлнэ. Гэхдээ энэ асуудал өнөөдөр шийдэгдэхгүй. Монгол Улсын хуулиар нэг хүн хоёр намд гишүүнчлэлтэй байж болохгүй. Ард түмний намын гишүүнчлэлээс би албан ёсоор гарсан. Намын даргын ажлыг өөр хүнд шилжүүлсэн. Хоёр жилийн өмнө би АН-ын даргын сонгуульд нэр дэвшээд М.Тулгат гэдэг залууд ялагдаж байсан. Одоо бодохоор инээд хүрээд байдаг. Дараа нь ерөнхийлөгчийн сонгуульд нэр дэвших өрсөлдөөнд өрсөлдөөд С.Эрдэнэд бас ялагдсан. Нэг ийм зүйл болсныг та бүхэн мэдэж байгаа. Энэ бол АН-д гишүүнээр элсээд, үйл ажиллагаанд нь идэвхтэй оролцож байгаагийн илрэл юм. Би Ардчилсан намыг ялалтад хүргэж чадна гэдэгтээ итгэлтэй байна" гэлээ.
Дашрамд дуулгахад, Ардчилсан нам хоёр талд хуваагдаад байсан асуудлыг шийдвэрлэхээр Эвлрэлийн Ажлын хэсгийг байгуулж, тус Ажлын хэсгээс өнгөрсөн долоо хоногт мэдээлэл хийж, дотоод асуудлаа шийдвэрлэсэн хэмээн мэдэгдсэн юм. Улмаар ирэх сонгуулиудад нэгдэж оролцоно гэдгээ хэлсэн. Тэгвэл өнөөдрийн ҮБХ-ны хуралд нийт 300 гаруй гишүүн оролцож, АН-ын даргаа тодруулах журмаа батлахаар болсон аж.
°C