Энэ онд хүүхдийн мөнгийг нийт хүүхдүүдийн 91 хувьд үргэлжлүүлэн олгохоор шийдвэрлэсэн. Өөрөөр хэлбэл Монгол улс 1,139.2 мянган хүүхдэд сар бүр 100 мянган төгрөгийг олгохоор хуульчилсан юм. Харин үлдсэн 9 хувийг хүүхдийн мөнгө авах шаардлагагүй хэт өндөр орлоготой өрхийн хүүхэд хэмээн тодорхойлж хасахаар болсон юм.
Иргэд хүүхдийн мөнгөн тэтгэмжид хамрагдах хүсэлт гаргах шаардлагагүй гэдгийг ХНХЯ-наас мэдээлж байв. Учир нь төрийн байгууллагын мэдээлэлд суурилан өрхийн амьжиргааг үнэлж хүүхдийн мөнгөн тэтгэмжид хамрагдах хүүхдийг тодорхойлох юм.
Улмаар хүүхдийн мөнгөнд хамрагдсан эсэхээ өнөөдрөөс /2023.01.16/ эхлэн ehalamj, Е-Моngolia системийг ашиглан шалгах, эсвэл сум, хорооны нийгмийн ажилтанд хандан шалгуулах аж. Мөн өчигдрөөс эхлэн эл үйлчилгээг үргэлжлүүлэн авах боломжтой гэсэн мессэжийг иргэдийн гар утасны дугаараар илгээж эхэллээ.
Үйлчилгээг зогсоосон тухай мэдэгдээгүй бол нэгдүгээр сарын 20-ны өдрөөс хүүхдийн мөнгийг үргэлжлүүлэн олгох юм. 2023 онд 1,367.0 тэрбум төгрөгийг хүүхдийн мөнгөнд зарцуулахаар баталжээ.
°C