“БАРМОН” ХХК-ийн хувьцаа эзэмшигч Ш.Үнэнбат нягтлантайгаа нийлж Хөгжлийн банкнаас авсан зээлийн мөнгөнөөс 9.3 тэрбум төгрөгийг бэлнээр авсан тухай Хөгжлийн банкны Нотлох баримтыг шинжлэн судлах сонсголын үеэр дурдлаа. Тодруулбал, сонсголын үеэр УИХ-ын гишүүн Ц.Мөнхцэцэг “БАРМОН” ХХК-ийн Хөгжлийн банкнаас авсан 13.8 тэрбум төгрөгийн зээлийн зарцуулалттай холбоотойгоор Шинжээчийн гаргасан дүгнэлтэд үндэслэн дараах хоёр асуудлын хүрээнд тус компанийн захирал Ш.Үнэнбатаас тодруулж хариулт авсан байна.
-Хөгжлийн банкнаас авсан зээлийнхээ эргэн төлөлтийг хийхгүй байгаа талаараа орон сууцны ипотекийн зээл авсан иргэдийн эргэн төлөлт 5 жилийн хугацаатай учраас түүнээс шалтгаалан манай компани зээлээ төлөхгүй байгаа гэж хариулж байна. Гэтэл иргэд зээлээр худалдан авсан орон сууцныхаа эргэн төлөлтийг, хүүгийн хамт сар бүр төлж байгаа. Иргэдийн төлж буй уг мөнгөөс яагаад зээлээ төлж болохгүй байна вэ?
-Зээлийн зарцуулалт дээр хийсэн Шинжээчийн дүгнэлтээс үзэхэд хэд хэдэн удаагийн гүйлгээгээр нийт 9.3 тэрбум төгрөгийг бэлнээр гаргаж авсан байна. Уг мөнгийг яг юунд зарцуулсан талаараа дэлгэрэнгүй мэдээлэл өгнө үү! хэмээн тодруулахад,
"Бармон" ХХК-ийг төлөөлөн гэрчээр оролцож буй Ш.Үнэнбат "Одоогоор ипотекийн зээлээ төлсөн иргэдийн мөнгө манай дансанд хуримтлагдсан байгаа. Хөгжлийн банкны гомдлоор хуулийн байгууллагуудад хариуцагчаар татагдан, шалгагдаж байгаа учраас гүйлгээ хийж болохгүй байгаа. Харин их хэмжээний бэлэн дүнтэй гүйлгээний тухайд туслан гүйцэтгэгч компаниудын ажлын төлбөрт өгсөн мөнгө болов уу" гэх хариултыг өглөө.
°C