Эрх баригч намын эмэгтэйчүүдийн холбоо буюу НАМЭХ-ны ээлжит их хурал өчигдөр Тусгаар тогтнолын ордонд боллоо. Уг хурлаар холбооныхоо нэрийг өөрчилж, дүрэмдээ ч өөрчлөлт оруулав.Нийгмийн ардчилал Монголын эмэгтэйчүүдийн холбоо хэмээх нэрээ Социал демократ Монголын эмэгтэйчүүдийн холбоо болгон өөрчиллөө. Тус холбоо нэрээ анх удаа өөрчилж байгаа нь энэ биш юм. 1994 онд байгуулагдсан энэхүү холбоо анх Эмэгтэйчүүд, хөгжил, хөдөлгөөн нэртэй байв. Улмаар 1998 онд Монголын ардчилсан социалист эмэгтэйчүүдийн холбоо, 2010 онд Нийгмийн ардчилал Монголын эмэгтэйчүүдийн холбоо болгон өөрчилж байсан юм.
Ингээд энэ өдрийн хамгийн чухал үйл явдал болох тэргүүнээ сонголоо. Хурлаас өмнө НАМЭХ-ны Ерөнхийлөгчийн төлөөх гол өрсөлдөөн одоогийн Ерөнхийлөгч УИХ-ын гишүүн Д.Сарангэрэл, Соёлын сайд Ч.Номин нарын хоооронд явагдана хэмээн олон хүн таамаглаж байсан ч таамаг эвдэгдэв. Д.Сарангэрэл залуучууддаа зайгаа тавьж өгөхөд бэлэн байна гэж мэдэгдсэнээр жагсаалтаас гарав. Харин Ерөнхий сайд Л.Оюун-Эрдэнэ Х.Булгантуяаг нэр дэвшүүлсэн нь биеллээ орж тэрбээр СДМЭХ-ны Ерөнхийлөгчөөр сонгогдов.
Ойрын үед албан тушаалын даллагатай байгаа Х.Булгантуяа ийнхүү намынхаа эмэгтэйчүүдийн холбоог тэргүүлэх болсон юм. Ингэснээр УИХ-ын гишүүн, Монгол Улсын сайд Боомтын сэргээлтийн үндэсний хорооны дарга, СДМЭХ-ны тэргүүн Х.Булгантуяа 2024 оны сонгуульд нэр дэвших эрхээ баталгаажуулж авлаа. Хэдий хуулинд зааж өгөөгүй ч намын дэргэдэх эмэгтэйчүүдийн байгууллагын тэргүүн сонгуульд нэр дэвшдэг жамтай.
°C