Нийслэлийн "Өргөө" амаржих газрын даргаар ажиллаж байсан Ж.Энхцэцэгийг ёсзүйн алдаа гаргасан хэмээн өнгөрсөн оны аравдугаар сард тухайн үеийн Эрүүл мэндийн сайд С.Энхболдын захирамжаар үүрэгт ажлаас нь чөлөөлж байсан.
Ж.Энхцэцэгийн хувьд ёсзүйн алдаа гаргаагүй хэмээн мэдэгдэж, тус амаржих газрын эмч, ажилтнуудтай холбоотой ажил үүргийн ноцтой алдаануудын талаар хэвлэл мэдээллээр дэлгэсэн. Улмаар уг асуудалтай холбоотойгоор Засгийн газраас шалгалтын Ажлын хэсэг байгуулж, "Өргөө" амаржих газарт өнгөрсөн хугацаанд ажиллаж байсан юм. Тэгвэл тус шалгалтын үйл ажиллагаа дуусаж, дүгнэлтээ гаргасан бололтой.
Эх сурвалжийн хэлж байгаагаар ЗГХЭГ-ын шалгалтын дүнг үндэслэн "Өргөө" амаржих газрын захирлаар Ж.Энхцэцэгийг буцаан томилохоор болсон байна. Эрүүл мэндийн сайд С.Чинзориг өнгөрсөн долоо хоногт Ж.Энхцэцэгийг дуудаж уулзан шалгалтын дүнг танилцуулсан гэх мэдээлэл гарч эхэлсэн. Тэгвэл уг мэдээлэл худлаа гэдгийг Эрүүл мэндийн сайд С.Чинзориг хэлэв. Тэрбээр "Өөрийнх нь хүсэлтээр өнгөрсөн долоо хоногт хүлээн авч уулзсан ч эргүүлэн томилох шийдвэр гаргаагүй" гэх тайлбарыг хэвлэлд өглөө.
°C