Баянгол дүүргийн Засаг дарга хийгээд нэр бүхий төлөөлөгчид БНСУ-д албан ажил нэртэй аялж зугаалж яваа талаар эх сурвалж мэдээллээ.
Байсхийгээд л тус улсыг зорьдог Баянгол дүүргийн удирдлагуудтай холбоотой “зугаалга” өмнө нь нэг биш удаа дэлгэгдэж байсан ч тэгсхийгээд өнгөрсөн. Гэсэн хэдий ч төсвийн хэмнэлт, хаа хаанаа бүсээ чангалж байгаа энэ үед Баянгол дүүргийн удирдлага, төлөөлөгчид өөр хоорондоо хэлэлцэн тохирч аялал, зугаалгыг “Secret” түвшинд зохион байгуулсаар байна. Хөндлөнгөөс харахад бараг л улирал тутамд явагдаж байгаа тэдний хэлдгээр "БНСУ дахь албан томилолт" төсвийн мөнгийг хий дэмий үрэн таран хийж байгаа болов уу гэсэн хардлагыг төрүүлж байна.
УУХҮ-ийн сайдаар УИХ-ын гишүүн, олноо “Оргил”-ын гэх тодотголтой Ж.Ганбаатарыг томилоод хэсэг хугацаа үдэж байна. Дарга тушаал ахисан бол цэргүүд шагналаа хүртэх нь ойлгомжтой гэдэг шиг түүнийг албан тушаалд суугаад удаа ч үгүй хэд хэдэн "гарынх нь хүн" БНСУ-аар аялж яваад ирсэн. Энэ үед мөн л албан томилолт, ажлын уулзалт нэртэй БГД-ийн өнөөгийн Засаг дарга Ө.Сумъяабаатар тэргүүтэй хүмүүс “зугаалж” явсан нь тухайн үед дэлгэгдсэн.
Мэдээж аль ч дүүргийн дарга нар албан айлчлал хэмээж гадагшаа, дотогшоо явж болно. Гэхдээ дагаж яваа хүмүүсийг нь харахад л айлчлал биш "зугаалга" гэж хэлэхүйц байгаа юм. Эсвэл нэг даргыг нэжгээд хүн дагаж явах журамтай байдаг юм уу?.
Төсвийн мөнгө уйлдаггүй гэдэг шиг ард иргэд ковидоос хойшх хямралаасаа гарч чадаагүй байхад зарим нэг нь бялуугаа хувааж, бөөн бөөнөөрөө зугаалж явах нь хэр зохимжтой вэ.
Ер нь төрийн хэмнэлтийн хууль, төсвийн ил тод байдлыг ярьж байгаа өнөөгийн Засгийн газар хуулийг чангаруулж, гадны айлчлал, томилолт, албан ажил, сургалт нэрийдэлтэй хурган дарга нарын "томилолтод” хяналт тавьж, гадагшаа "зугаалганд" хэдэн төгрөгийн төсөв урсаж байгааг ил тод зарламаар юм.
°C