Балбад Gen-Z үеийнхэн бүх нийтийн эсэргүүцлийн жагсаал цуглаан явуулсны дараа энэ улсад парламентын сонгууль явагдсан. Тэгвэл сонгуульд рэп-дуучин, Катманду хотын захирагч асан Балендра Шах үнэмлэхүй ялалт байгуулжээ.
Балбын RSP Үндэсний эрх чөлөөний намаас сонгуульд нэр дэвшсэн 35 настай Шах энэ улсын ерөнхий сайдын суудлыг 4 удаа хашсан хашир туршлагатай улс төрч 74 настай Шарма Олитой өрсөлдөн ялжээ.
Балбад болсон сонгуулийг энэ улсын орчин цагийн түүхэн дэх хамгийн нээлттэй, ил тод явагдсан сонгууль гэж тооцож байна.
Залуус эх орондоо авлига хээл хахуультай тэмцэж, улс төрийн шинэ эрин үеийг эхлүүлэхийн төлөө тэмцэж, Gen-Z үеийн тэмцэл ийнхүү бодит үр дүнд хүрчээ.
Балендра Шах нь Балбын залуусыг төлөөлөн сонгуульд өрсөлдсөн. Инженер мэргэжилтэй, рэп дуучин тэрээр 2022 оноос улс төрд орж, Катманду хотын амбан захирагчийн сонгуульд бие даан нэр дэвшин ялжээ. Тэрээр хотын захирагчийн ажлаа хууль бусаар баригдсан барилга байшинг буулгах, хур хогны асуудлыг шийдвэрлэхээс эхлүүлж байжээ.
Балбад 2025 оны 9-р сард Gen-Z үеийнхэн нийгмийн сүлжээг хязгаарлан хориг тавьсан эрх баригчдынхаа шийдвэрийг эсэргүүцэн авлига хээл хахууль, эдийн засгийн уналт зэргийн эсрэг нэгдэн гудамж талбайдаа гарсан. Залуусын үймээний үеэр эмх замбараагүй байдал үүсч, 70 гаруй хүн амиа алджээ. Балбад үүссэн энэ нөхцөл байдал ерөнхий сайд Шарма Олигийн засгийн газрыг унагаж, бүх нийтийн сонгууль явагдахад хүргэсэн юм.
°C