ГААЛИЙНХАНД ХОЛБОГДОХ 20 ХЭРГЭЭС 16-Г ШҮҮХ ШИЙДВЭРЛЭЭД БАЙНА

Авлигатай тэмцэх газрын Мөрдөн шалгах хэлтэс гаалийн улсын байцаагч, гаалийн итгэмжлэгдсэн төлөөлөгч, тээвэрлэгч нарт холбогдох эрүүгийн 20 хэрэг мөрдөн шалгаж, шүүхэд шилжүүлэх саналтайгаар прокурорын байгууллагад хүргүүлсэн. Үүнээс 16-г нь шүүх хянан шийдвэрлээд байна.

Гаалийн ерөнхий газар, Улаанбаатар хотын Гаалийн газар, Замын-Үүд дэх Гаалийн газрын нэр бүхий албан тушаалтнууд улсын хилээр бараа, тээврийн хэрэгсэлд гаалийн хяналт шалгалт хийхдээ бүрэн эрх, албан тушаалаа урвуулан ашиглаж, бараа тээвэрлэгч аж ахуйн нэгжүүдийн ашиг сонирхлын үүднээс гүйцэтгэх ёсгүй үйлдлийг гүйцэтгэж үргэлжилсэн үйлдлээр хахууль авах, хууль бусаар олсон орлогын эх үүсвэр, бодит шинж чанарыг өөрчлөн мөнгө угаасан хэргийг АТГ 2026 оны 5 дугаар сард илрүүлэн шалгасан юм. Тэд Эрүүгийн хуулийн 22.1, 22.4, 22.5, 22.10-т заасан гэмт хэргийг бүлэглэн үйлдсэн байж болзошгүй гэж АТГ үзэж байв.

Эрүүгийн 24 хэрэгт холбогдуулан гаалийн улсын байцаагч 40, итгэмжлэгдсэн төлөөлөгч 31 хүнийг яллагдагчаар татаж, мөрдөн шалгах ажиллагааг явуулсан байна. Шүүхээс хянан шийдвэрлэсэн хэрэг:

• Эрүүгийн хуулийн 22.4-1-т заасан хахууль авсан гаалийн улсын 7 байцаагчид 1 жил хорих ял ногдуулж, төрийн албанд ажиллах эрхийг нь хассан.
• Эрүүгийн хуулийн 22.5-1-т заасан хахууль өгөх гэмт хэрэг үйлдсэн итгэмжлэгдсэн 6 төлөөлөгчийг тус бүрийг 2,7 сая төгрөгөөр торгон, төрийн албанд ажиллах эрхийг нь хассан.
• Эрүүгийн хуулийн 22.5-1-т заасан хахууль өгөх гэмт хэргийг үйлдсэн итгэмжлэгдсэн төлөөлөгч 1 хүнийг 4 сая төгрөгөөр торгов.
• Эрүүгийн хуулийн 22.4-1, 22.5-1-т заасан хахууль авах, өгөх гэмт хэргийг үйлдсэн гаалийн улсын 1 байцаагч, итгэмжлэгдсэн 1 төлөөлөгчид тус бүр 1 жил 1 хоног хорих ял оноож, нийтийн албанд ажиллах эрхийг нь 2 жил 6 сараар хассан.

Одоогийн байдлаар эрүүгийн 1 хэрэг Дорноговь аймгийн Замын-Үүд сум дахь Сум дундын шүүхэд байгаа аж. Харин 18 хүнд холбогдох эрүүгийн 3 хэргийг нийслэлийн Прокурорын газар хянагдаж байна. АТГ эрүүгийн 4 хэрэг мөрдөн шалгаж байна.