Өнөөдөр сүрьеэ өвчинтэй тэмцэх дэлхийн өдөр. Энэ өдрийг дэлхий нийтээр “Улс орнуудын манлайлал, олон нийтийн оролцоотойгоор бид сүрьеэг зогсоож чадна” гэсэн уриан дор тэмдэглэж байна.
Эрүүл мэндийн яамны мэдээлснээр, 2025 онд Монгол Улсад нийт 2851 сүрьеэгийн тохиолдол бүртгэгдэж, 182 хүн сүрьеэгийн улмаас нас баржээ.
Үүнээс батлагдсан нийт тохиолдлын 165 нь хүүхдийн сүрьеэ, 129 нь олон эмэнд тэсвэртэй сүрьеэгийн тохиолдол байна. Нийт өвчлөгсдийн 63.1 хувийг эрэгтэй, 36.9 хувийг эмэгтэйчүүд эзэлж байгаа нь эрэгтэйчүүдийн дунд өвчлөл харьцангуй өндөр байгааг харуулж байна.
Сүрьеэгийн тархалтыг байршлаар авч үзвэл нийт тохиолдлын 57.2 хувь нь Улаанбаатар хотод, 40.6 хувь нь орон нутагт, 2.2 хувь нь хорих байгууллагад бүртгэгдсэн байна. Эмчилгээний үр дүнгийн хувьд халдварт хэлбэрийн сүрьеэгийн эмчилгээний амжилт 78.4 хувь, олон эмэнд тэсвэртэй сүрьеэгийн эмчилгээний амжилт 65.3 хувь байгаа нь цаашид эмчилгээний чанар, хүртээмжийг сайжруулах шаардлагатайг харуулж байгаа юм.
Монгол Улс сүрьеэгийн дарамт өндөртэй дэлхийн 30 орны нэг бөгөөд ДЭМБ-аас Монголд жилд 13-17 мянган хүн сүрьеэгийн халдвар авч байна гэсэн тооцоолол гаргажээ. Сүрьеэгийн халдвартайгаа мэдэхгүй, мэдсэн ч эмчилгээгээ таслаад явдаг хүмүүс жилдээ 10-15 хүнийг өвчлүүлэх эрсдэлтэй.
°C