Олон улсын нэр хүндтэй математикийн тэмцээн болох Интернэшнл Математикс Компетишн буюу IMC-ийг энэ жил анх удаа Монгол Улсад зохион байгуулахаар бэлтгэл ажлыг эхлүүлжээ. Тус олимпиад долдугаар сарын 22–27-ны өдрүүдэд Налайх дүүрэг дэх Монгол-Германы Хамтарсан Ашигт Малтмал, Технологийн Их Сургуулийн кампуст болно. Монгол Улс 25 дахь удаагийн тэмцээнээс цом хүртсэнээр 2026 онд эх орондоо зохион байгуулах эрхийг авсан байна. Тэмцээнд дэлхийн 40 гаруй орны шилдэг сурагчид оролцож, бага болон дунд ангийн ангилалд хувийн, багийн гэсэн хоёр төрлөөр өрсөлдөнө.
Монгол Улсаас 21 аймаг, Улаанбаатар хотын сургуулиудаас нийт 750 орчим сурагч сонгон шалгаруулалтад оролцсоноос 6 болон 9 дүгээр ангийн нийт 80 сурагч шалгарч, эх орноо төлөөлөх эрхтэй болжээ. Олон улсын математикийн олимпиад нь сурагчдын логик сэтгэлгээ, асуудал шийдвэрлэх чадварыг хөгжүүлэхийн зэрэгцээ математикийн боловсролын түвшнийг ахиулах ач холбогдолтой.
°C