Толгойтоос Ард Аюушийн өргөн чөлөө хүртэлх авто замын ажил 90 хувьтай үргэлжилж байна. Тус замын ажлыг ирэх долдугаар сарын 10-н гэхэд бүрэн дуусгана гэдгийг албаныхан хэлэв.
Тодруулбал, Толгойтын авто замаас Ард Аюушийн өргөн чөлөө хүртэлх 3.9 км авто замын ажлыг 2023 онд эхлүүлсэн. Толгойтын замыг Ард Аюушийн өргөн чөлөөтэй холбох уг авто зам нь зургаан эгнээ зорчих хэсэг, дөрвөн нүхэн гарц, нэг гүүрэн гарцтай.
Тус замыг ашиглалтад оруулснаар Энхтайваны өргөн чөлөөний баруун хэсгийн ачааллыг 50 хүртэлх хувиар бууруулна гэдгийг албаныхан хэлж байгаа юм. Улмаар 2025 оны аравдугаар сард эхний 2.8 км авто замын зорчих хөдөлгөөнийг нээсэн. Үргэлжлүүлэн явган зам болон гүүрэн байгууламжийн ажлыг хийж буй. Тэгвэл ажлын явц өнөөдрийн байдлаар 90 хувьтай байгаа бөгөөд Ард Аюушийн өргөн чөлөөний хэсэгт тулц хана байгуулах, гадаргын ус зайлуулах шугам угсрах, авто замын өргөтгөлийн суурь бэлтгэх ажлуудыг хийж байгаа юм байна. Мөн иргэд, аж ахуйн нэгжүүдийн хүсэлтийн дагуу дөрвөн байршилд гэрэл дохиотой явган хүний гарц, хоёр байршилд гэрлэн дохионы зохицуулалттай дөрвөн замын уулзвар нэмэлтээр хийж байгаа гэдгийг НЗХГ-ын Зам барилгын хяналтын хэлтсийн ахлах мэргэжилтэн Б.Түшиг-Эрдэнэ хэлэв. Тэрбээр, "Төслийн нийт ажлын 40 орчим хувийг шугам сүлжээний ажил эзэлж байгаа. Үүнээс 85 хувийг нь гүйцэтгэсэн. Өнөөдрийн байдлаар нийт ажлын явц 90 хувьтай үргэлжилж байна. Ирэх долдугаар сарын 10-нд бүрэн дуусгахаар төлөвлөж байна” гэлээ.
°C