Японд шинэ төгсөгчдийн ажил хайлтын улирал ид эхэлж байна. Ажил горилогсод өргөдөл гаргахдаа хиймэл оюун ухаан ашиглах нь ихэссэн тул компаниуд шинэ сорилттой тулгараад буй. Гэхдээ ажил олгогчид энэ чиг хандлагатай тэмцэх бус дасан зохицож эхэлжээ. Тэд ажлын ярилцлагын үеэр бодит хүн бус хиймэл оюун ухаант аватарыг ашиглаж байна.
Шизүока мужид байрлах мэдээллийн технологийн "Suzuyo System Technology" компани өмнө нь ажил горилогчдоос өөрсдийгөө танилцуулах, ажилд орох хүсэл зорилгоо тайлбарласан эсээ зэрэг зүйлийг шаарддаг байжээ. Гэвч одоо үүнийгээ болиод тэднийг шууд ажлын ярилцлагад урьдаг болсон. Оюутнууд өргөдөл бичихдээ хиймэл оюун ухаан ашиглаж эхэлсэн тул үүнд тулгуурлан тэднийг үнэлэх нь найдваргүй арга болсон гэсэн үг.
Хиймэл оюун ухаант аватар ажил горилогчтой 30 минут ярилцана. Энэ үеэр хиймэл оюун ухаант аватар олон өнцгөөс асуулт асууж, өргөдөл гаргагчийн зан чанарыг ойлгох, харилцааны ур чадварыг нь үнэлэхэд шаардлагатай мэдээллийг цуглуулдаг. Ямар зорилгоор уг ажлыг сонирхож байна, оюутан байхдаа юунд төвлөрч байв, ажилд орсныхоо дараа юу хийж, хэрхэн ажиллахыг хүсч байна зэрэг энгийн асуултаас гадна өөрийгөө ямар төрлийн бялуутай зүйрлэх вэ зэрэг өвөрмөц асуултыг хүртэл хиймэл оюун ухаант аватар асуух ажээ.
Уг ярилцлагыг бичлэгээр хадгалж үлдэх бөгөөд сүүлд нь бодит хүний нөөцийн ажилтнууд дүн шинжилгээ хийхдээ ашигладаг.
"Beyond" компани ч бас хиймэл оюун ухааныг сонгон шалгаруулалтдаа ашиглаж байна. Гэхдээ өмнөх компаниас арай өөр арга барилаар буюу өргөдөл гаргагч болон ярилцлага авагчийг хоёуланг нь аватараар төлөөлүүлэх шийдэл гаргажээ.
Оюутнууд ярилцлагад орохдоо өөрсдийн аватарыг бүтээдэг. Энэ үед өргөдөл гаргагчийн нэр болон сургууль нууцлагддаг учир тухайн компанид ямар нэгэн байдлаар урьдчилсан дүгнэлт хийх, хэвшмэл хандлага гаргах боломж олгохгүй. Өөрөөр хэлбэл, зөвхөн ярилцлагад тулгуурлан үнэлгээ хийх боломж бүрдэнэ. Энэ төрлийн ярилцлагыг нэвтрүүлснээс хойш тус компанид өргөдөл гаргагчдын тоо нэмэгдэх болсон гэдгийг хэлж байна.
°C