Улаанбаатар хотын тодорхой байршил буюу Гандан, Зурагт, Дэнжийн мянга зэрэг газруудад нийт 5000 өрхийн дулаалгыг хийж, газ руу холбох ажил үргэлжилж байна. Үүнээс гадна гэр хороололд нийт 22 цэг байгуулан, ажиллаж байна. Айл өрхүүд хоосон баллоноо цэгүүдэд очиж цэнэглэх юм уу цэнэглэсэн баллоноор сольж авах гэнэ. Ингэснээр тухайн бүсийн агаарын бохирдол 10-20 хувь буурна гэж албаныхан тооцоолж байгаа аж.
Энэ талаар өмнө нь нийслэлийн Засаг даргын орлогч А.Амартүвшин мэдээлэл өгөхдөө "Бид дараа жилээс гэр хорооллын 50 мянган айлыг газны хэрэглээнд шилжүүлж, 2027-2028 онд 65 мянган айлыг шилжүүлнэ. Харин 2027-2028 онд нийт 105 мянган айл газны хэрэглээнд нэвтэрч, Улаанбаатар хотын утааны асуудал бүрэн шийдэгдэнэ" гэдгийг хэлж байв.
Уг асуудлаар нийслэлийн Хийн хангамж, удирдлагын газрын захирал М.Жаргалсайханаас тодруулсан юм. Тэрбээр "БНХАУ-ын “Haier” болон “Hisense” компаниудад үйлдвэрлэсэн хийн зуухыг суурилуулах ажил 2026 оны нэгдүгээр сараас эхэлж, үргэлжилж байна. Өнөөдрийн байдлаар нийт 5000 айлаас 4000-г нь шууд газан зууханд шилжүүлээд байна. Айлуудад галлагааны улирал буюу есдүгээр сарын 15-наас тавдугаар сарын 15-ныг хүртэлх хугацаанд 900 мянган төгрөгийн урамшуулал олгож байгаа. Иргэд урамшууллын мөнгөө хуримтлуулж, өвлийн ид хүйтний улиралдаа ашиглах боломжтой. Үлдсэн 1000 айлыг тавдугаар сарын 15-наас өмнө шилжүүлж дуусгана. Эдгээр хийн зуух нь 2-3 сая төгрөгийн үнэтэй бөгөөд гэр хорооллын айлуудад үнэ төлбөргүй суурилуулж байна. Хамгийн гол нь айлууд дулаан алдагдлаа бүрэн шийдсэн байх шаардлагатай. Гэр хорооллын айлууд хийн зуухыг хэрэглэснээр агаарын бохирдол тодорхой хэмжээгээр буурахаас гадна үнс хаягдал гарахгүй байх зэрэг давуу талуудтай. Эдгээр хийн зуухыг дүүргийн өмчид бүртгэсэн бөгөөд иргэд хийн зуухаа эвдэх, зарж борлуулсан тохиолдолд зуухны төлбөрийг нөхөн төлүүлж, нэхэмжилнэ" гэв.
°C