Нийгмийн халамжийн тухай хуулийн шинэчилсэн найруулгын төслийн хэлэлцүүлэг Пүрэв гарагт болж, 150 орчим төлөөлөл оролцлоо. Монгол Улс халамжид их хэмжээний төсөв зарцуулж байгаа ч үр нөлөө хангалтгүй байна. Тухайлбал, 2025 онд 2.4 их наяд төгрөг буюу ДНБ-ий 2.7 хувийг зарцуулжээ. Гэвч тодорхой хэсэг нь зорилтот бүлэгт бүрэн хүрэхгүй, бэлэн мөнгө давамгайлсан хэлбэр нь ядуурлыг бууруулахад нөлөөлөхгүй байгааг онцоллоо. Иймд хуулийн төсөлд халамжийг хөдөлмөр эрхлэлттэй уялдуулах, зорилтот бүлэгт чиглэсэн бодит үйлчилгээ үзүүлэхэд анхаарч, иргэдийг тогтмол орлоготой болгох, боловсрол болон нийгмийн үйлчилгээний дэмжлэгийг нэмэгдүүлэхээр тусгажээ. Албаныхны мэдээлснээр, халамж авч буй иргэд ажил хийх сонирхолтой ч ур чадварын зөрүү, ажлын байрны шаардлага зэрэг шалтгаанаар ажилд зуучлахад хүндрэл тулгардаг байна. Тиймээс халамжаас хөдөлмөрт шилжих бодлогыг үе шаттай хэрэгжүүлэх шаардлагатайг онцоллоо.
°C