Армян улсын нийслэл Ереван хотноо “Европын улс төрийн нийгэмлэг”-ийн 8 дахь удаагийн дээд хэмжээний уулзалт ажлаа эхэлж байна. Уулзалт “Европын эв нэгдэл, тогтвортой байдлын төлөөх Ирээдүйг бүтээцгээе” гэсэн уриан дор болж, дээд уулзалтад оролцохоор дэлхийн 50 гаруй улс орны төр засгийн тэргүүлэгчид хуран цуглаж байна.
Дээд уулзалтад ЕХ-ны гишүүн 27 улс орон, мөн Европ тивийн бусад улс орны төр засгийн тэргүүлэгчид, тэр дундаа Их Британийн Ерөнхий сайд Кир Стармер, Украины ерөнхийлөгч Владимир Зеленский, Францын төрийн тэргүүн Эммануэль Макрон, Польшийн ерөнхий сайд Дональд Туск нар Ереван хотноо хүрэлцэн иржээ.
Дээд хэмжээний уулзалтыг Европын зөвлөлийн тэргүүн Антониу Кошта болон Арменийн ерөнхий сайд Никол Пашинян нар удирдан явуулна. Уулзалтын үеэр бүс нутгийн болоод дэлхийн дахины анхаарал татсан асуудлууд, тэр дундаа Америк болон Ираны хоорондын хурцадмал байдал, цаг үеийн олон чухал сэдвийг хөндөн хэлэлцэхээр төлөвлөж байна.
Энэ удаагийн дээд уулзалтад анх удаа Канад улс оролцоно. Хэдийгээр Канад улс Европын бүрэлдэхүүнд багтдаггүй ч Европ болон Канадын харилцаа холбоог дээд түвшинд хэлэлцэх нь чухал гэсэн үүднээс Ереваны дээд уулзалтад оролцох хүсэлтээ гарган ерөнхий сайд Марк Карни хүрэлцэн ирж байгаа юм.
Европын Улс Төрийн Нийгэмлэг нь 2022 онд байгуулагдаж, Нэгдсэн Европын ирээдүйн төлөө улс орнуудын засгийн газар хоорондын улс төрийн болоод стратегийн түншлэл, харилцааг бэхжүүлэх зорилгоор байгуулагджээ.
°C