Иран улс Ормузын хоолойн бүсэд Америкийн хөлөг онгоцнууд руу гал нээжээ. Энэ явдал АНУ-ын Ерөнхийлөгч Дональд Трамп Ормузын хоолойн бүсэд Америкийн тэнгисийн цэргийн хүчний хөлөг онгоцнууд нефть ачсан гадны хөлгүүдийг дагаж, хамгаалах үүрэг хүлээнэ гэж мэдэгдсэний дараа болжээ.
Тэгвэл Трампын энэ мэдэгдлийг үл харгалзан Исламын хувьсгалт харуулын корпус Ормузын бүсэд Америкийн цэргийн хөлөг онгоц руу хоёр пуужин харважээ. Ираны Фарс мэдээллийн агентлагийн мэдээлснээр Ормузын хоолойгоор нэвтэрсэн Америкийн хөлөг Жаск боомтын ойролцоох далай тэнгисийн аюулгүй байдал, навигацийн хууль журмыг зөрчсөн учраас сануулах дохио өгсний дараагаар гал нээсэн байна.
Америкийн тэнгисийн цэргийн хүчин дээрх явдлыг үгүйсгэн, Ормузын хоолойд ямар ч цэргийн хөлөг онгоц дайралтад өртөөгүй гэжээ. Америкийн тал ерөнхийлөгч Трампын шийдвэрийн дагуу бүс нутагт “Эрх чөлөө” ажиллагааг дэмжин Ираны боомтуудыг бүслэн, хоригийг мөрдөж байгаа юм.
°C