Дорноговь аймгийн Дэлгэрэх сумын ЗДТГ-аас санаачилж "Цэвэршүүлсэн усны төв"-ийг өнөөдөр ашиглалтад орууллаа. Сумын Засаг даргаас орон нутагт цэвэршүүлсэн унсны төв байгуулах саналыг НҮБ-ын Хүүхдийн санд гаргаснаар тус сангаас хүүхдүүд болоод хүн амын ундны усны чанарыг сайжруулж шийдвэрлэх зорилгоор уг төсөлд 100 сая төгрөгийн хөрөнгө оруулалт хийсэн бол сумын ОНХС-гаас 65 сая төгрөгийг шийдвэрлэсэнээр "Баялаг говь" ХХК гүйцэтгэж өнөөдөр орон нутагт хүлээлгэн өгсөн байна. Тус төв нь 24 цагаар тасралтгүй ажиллах бүрэн автомат ухаалаг системтэй бөгөөд өдөрт 15 тонн ус цэвэршүүлэн гаргах боломжтой юм. Байнга хэвийн ажиллах өндөр хүчин чадалтай, нар, цахилгаан хосолсон эрчим хүчний эх үүсвэртэй, эко бүтээн байгуулалт юм. Дэлгэрэх сум 2000 гаруй хүн амтай. Ундны ус нь хатуулаг ихтэй байдаг аж. Цэвэршүүлсэн усны төвтэй болсноор сумын нийт хүн ам 24 цагийн турш 99 хувь цэвэршүүлсэн усыг хэрэглэх боломж бүрдэж, баллонтой цэвэршүүлсэн ус тээвэрлэдэг байдлыг халж, цэвэр усыг ойроос хямд, хүртээмжтэй хүргэх нөхцөл бүрдэж, нийгмийн эрүүл мэндэд ахиц дэвшил гарлаа хэмээн сумын ЗДТГ-аас мэдээлэв. Нэг литр цэвэр ус 99 төгрөгийн үнэтэй бөгөөд хэрэглэгчид өмнө нь ашиглаж байсан ухаалаг картаа мөнгөөр цэнэглэснээр 24 цагийн турш цэвэр ус хэрэглэх боломжтой.
°C