Отгонтэнгэр уулыг тахих төрийн их ёслол 6 дугаар сарын 17-ны өдөр болохыг Завхан аймгийн ЗДТГ-аас мэдээллээ.
Товыг Монгол Улсын Ерөнхийлөгчийн 2010 оны 5 дугаар сарын 6-ны өдрийн 85 дугаар зарлигаар батлагдсан “Төрийн тахилгатай уул, овооны тэнгэрийг тайх тахилгын ёслолын журам”-ын 1.2.14 дэх хэсэг, мөн 2022 оны 3 дугаар сарын 14-ний өдрийн 28 дугаар зарлигаар батлагдсан “Төрийн тахилгатай уул, хайрхныг тайх төрийн ёслол үйлдэх хуваарь”-ийн 10 дахь хэсгийг үндэслэн тогтоожээ. Мөн Отгонтэнгэр уулын тэнгэрийг тайх төрийн тахилгын ёслолыг 2026 оны 6 дугаар сарын 21-ний өдөр зохион байгуулах саналыг өмнө нь Монгол Улсын Ерөнхийлөгчид уламжилсан байна. Түүхэн сурвалжуудаас үзвэл Отгонтэнгэр уулыг VI–VIII зууны үед Түрэгийн үед тахиж байсан бөгөөд Манж чин гүрний үед 1779 онд дахин сэргээн тахижээ. Үүний дараа хэсэг хугацаанд тасалдсан ч 1911 онд Богд хааны зарлигаар жил бүр шашны ёсоор тахихаар тогтоож, энэ уламжлал 1930 он хүртэл хадгалагдан үргэлжилжээ.
Харин 1995 оны наймдугаар сарын 1-нд Монгол Улсын анхны Ерөнхийлөгч Пунсалмаагийн Очирбатын зарлигаар Отгонтэнгэр уулыг дахин сэргээн тахиж эхэлсэн нь шинэ нийгмийн нөхцөлд төр, шашны харилцан хүндлэл, шүтэлцээг бэхжүүлэх чухал үйл явдал болсон юм. Үүнээс хойш Отгонтэнгэр уулыг дөрвөн жил тутамд төрийн тахилга үйлдэхээр тогтсон байна. Тодруулбал,
1999 оны 8 дугаар сарын 10
2003 оны 6 дугаар сарын 14
2007 оны 6 дугаар сарын 29
2011 оны 6 дугаар сарын 9
2016 оны 7 дугаар сарын 22
2021 оны 8 дугаар сарын 21-нд тус тус тахижээ.
Энэ жил Отгонтэнгэр уулыг төр, шашны ёсоор 7 дахь удаагаа тахих юм байна.
°C