5-р сарын 11-нээс буюу өнөөдрөөс эхлэн Оросын иргэд Саудын Араб руу визгүй зорчихоор болжээ. Орос болон Саудын Арабын талууд харилцан тохиролцсоны үндсэн дээр өмнө нь визтэй зорчдог байсан журмыг халж, 5-р сарын 11-ний өдрөөс эхлэн Оросын иргэд визгүй зорчих боломжтой боллоо.
Оросын Гадаад хэргийн яамны мэдээллээр Оросын иргэд аялал жуулчлалын зорилгоор Саудын Арабт 90 хүртэлх хоногоор визгүй зорчих боломжтой болжээ.
Өмнө нь зөвхөн мусульманы мөргөлчдөд шашин зан үйлийн зорилгоор тодорхой хугацаагаар улс орондоо нэвтрэхийг зөвшөөрдөг байсан Саудын Араб нь аялал жуулчлал өсөхийн хирээр 2019 оноос эхлэн гадны улс орнууд, тэр дундаа Оросын иргэдэд хөнгөлөлттэй нөхцлөөр виз олгож эхэлжээ. Тухайн үед Саудын Арабын визийг олон дахин ашиглах электрон, аялал жуулчлалын виз хэлбэрээр олгож эхэлсэн байна.
Оросын иргэдэд Саудын Арабт 90 хоног хүртэлх хугацаагаар визгүй зорчих журам нэвтэрснээр жуулчид Улаан тэнгисийн уснаа байрлах тансаг зэрэглэлийн аялал жуулчлалын бүсийг олноороо зорих бололтой.
Саудын Арабын аялал жуулчлалын компаниуд Оросын жуулчдад зориулсан шинэ чиглэл боловсруулж байгаа ч одоогоор энэ улсад 7 хоног аялах доод зардал 2 мянган доллараас эхэлж, Улаан тэнгисийн амралт аялал жуулчлалын бүсэд 5 одтой зочид буудалд буудаллахад хоногийн 400 долларын үнэ ханштай байна.
Саудын Арабын Аялал жуулчлалын яам гадны улс орнуудын иргэдэд визийн хөнгөлөлт үзүүлснээр 2030 он гэхэд жилд 150 сая аялагч жуулчид, шашны мөргөлчид хүлээн авахаар тооцоолж байна.
°C