Кембрижийн их сургуулийн эрдэмтэд хиймэл оюун ухаан (AI) ашиглан шинэ төрлийн вакцин бүтээжээ. Тэдний үзэж байгаагаар энэ вакцин нь олон төрлийн вирусээс хамгаалж, ирээдүйд гарч болзошгүй тахлаас урьдчилан сэргийлэх боломжтой юм. Вакцины үндсэн найрлагыг "AI" бүрэн зохион бүтээж, дараа нь хүмүүст туршсан анхны тохиолдол энэ болж байна. Энэхүү вакцин нь бүх төрлийн коронавирусийн эсрэг үйлчлэхээр бүтээгдсэн. Үүнд "Covid-19"-ийн бүх хувилбар, ирээдүйд дэгдэлт үүсгэж болзошгүй амьтдаас илэрсэн холбогдох вирусүүд орж байна. Судалгаа одоогийн байдлаар эхний шатандаа явж байгаа ч судлаачид томуу болон Эбола вирусийн эсрэг ижил зарчмаар вакцин боловсруулах ажлыг мөн эхлүүлээд байна. Вакцин нь хүний дархлааны тогтолцоонд халдварыг таньж, үүнтэй тэмцэх чадварыг бий болгоход тусалдаг. Гэвч зарим вирус маш хурдан мутацид орж чаддаг тул одоо байгаа вакцинуудын үр нөлөө буурах боломжтой. Тиймээс "Covid-19" болон улирлын томуугийн вакциныг тогтмол шинэчилж байдаг. Судалгааг удирдсан профессор Жонатан Хинигийн хэлснээр, эрдэмтэд ихэвчлэн вирус өөрчлөгдсөний дараа арга хэмжээ авч байдаг. Харин түүний баг вирусийн ирээдүйн хувилбаруудыг урьдчилан тооцож, тэдгээрээс хамгаалах вакцин бүтээх замаар “түрүүлж алхах”-ыг зорьж байна.
Ихэнх вакциныг тухайн үед тархаж байгаа вирусээс дээж авч бүтээдэг. Харин Кембрижийн их сургуулийн эрдэмтэд олон төрлийн коронавирусийн генетикийн мэдээллийг цуглуулж, тэдгээрийг "AI"-аар шинжилжээ. Дараа нь "AI" нь тухайн вирусийн мэдээлэлд тулгуурлан, нийтлэг шинж чанаруудыг нь ашиглан "супер антиген" хэмээх шинэ бүрэлдэхүүн хэсгийг зохион бүтээсэн байна. Энэ нь хүний дархлааны системийг зөвхөн нэг вирус биш, харин бүхэл бүтэн вирусийн бүлгийг таньж хамгаалах чадварт сургах зорилготой юм. Өөрөөр хэлбэл, амьтнаас хүнд шинээр дамжих коронавирус гарсан ч хамгаалах боломжтой байж магадгүй.
Профессор Жонатан Хинигийн хэлснээр, эхний туршилтад 39 хүн оролцсон бөгөөд супер антигентэй вакцин аюулгүй эсэхийг шалгах байв. Одоо 200 орчим хүнийг хамарсан дараагийн шатны судалгаа явагдаж байна. Мөн вакцины дархлаа өдөөх нөлөө нь хязгаарлагдмал байгаа ч эрдэмтэд энэ технологийг маш ирээдүйтэй гэж үзэж байна. Судлаачид үүнээс гадна жил бүр шинэчлэх шаардлагагүй бүх нийтийн томуугийн вакцин, "H5N1" шувууны томуугийн вакцин болон эбола зэрэг цусархаг халууралтын вирусүүдийн эсрэг вакцин дээр ажиллаж байна.
°C