Нийслэлийн нутгийн захиргааны байгууллагуудад ажиллаж буй 145 албан хаагч төрийн жинхэнэ албан хаагчийн тангараг өргөлөө. Монгол Улсын Төрийн албаны тухай хуулийн 36 дугаар зүйлийн 36.1 дэх хэсэг, Монгол Улсын Ерөнхийлөгчийн 2024 оны 84 дүгээр зарлигаар баталсан “Төрийн жинхэнэ албан хаагчийн тангараг өргөх ёслолын журам”-ыг баримтлан, нийслэлийн нутгийн захиргааны байгууллагад ажиллаж буй албан хаагчдыг тангараг өргүүлэх ёслолын үйл ажиллагаа өнөөдөр боллоо. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Монгол Улсын Үндсэн хуульд “Монгол Улсын төрийн жинхэнэ албан хаагч нь Үндсэн хууль, бусад хуулийг чандлан баримталж, ард түмнийхээ тусын тулд, иргэний ёсоор төрийн ашиг сонирхолд захирагдан ажиллана” гэж заасан байдаг. Төрийн жинхэнэ албан хаагчийн тангараг өргөх нь төрдөө андгай өргөж, гагцхүү хуульд захирагдан ажиллахаа төр, түмнийхээ өмнө илэрхийлж буй хэрэг юм. Залуу насныхаа эрч хүч, мэдлэг боловсрол, бүтээлч сэтгэлгээг эх орон, нийслэл хотынхоо хөгжилд зориулахаар сонголтоо хийсэн та бүхэнд нийслэлчүүдийнхээ нэрийн өмнөөс талархал илэрхийлье.
Нийслэлийн Засаг даргын хувьд төрийн үйлчилгээг илүү хурдан, шуурхай, ил тод, хамгийн гол нь иргэддээ чирэгдэлгүй, хүнд сурталгүй болгоход анхааран ажиллаж байна. Иргэн төрийг өөртэй нь уулзсан нэг албан хаагчаар дүгнэдэг. Та бүхэн төрийн үйлчилгээнд процессын дахин инженерчлэл хийж, давхардсан шат дамжлагыг цөөрүүлэх, цахим шилжилтийг эрчимжүүлэх реформд хамтран зүтгэнэ гэдэгт итгэлтэй байна. Энэ шинэчлэлийн гол зорилго нь төрийн албан хаагчийг илүү их ажиллуулах бус, илүү ухаалаг ажиллах боломжийг бүрдүүлэх юм. Үүний зэрэгцээ төрийн албанд мерит зарчим, гүйцэтгэлд суурилсан үнэлгээ, мэргэжлийн тогтвортой байдлыг бэхжүүлэх нь бидний бодлогын үндсэн чиглэл хэвээр байх болно” гэлээ.
Энэ үеэр нийслэлийн нутгийн захиргааны байгууллагуудад тогтвортой, үр бүтээлтэй, ёс зүйг эрхэмлэн, манлайлан ажиллаж буй төрийн захиргааны 13 албан хаагч Монгол Улсын “Төрийн албаны тэргүүний ажилтан” цол, тэмдгээр шагнагдлаа.
°C