С.Зориг агсны хөшөөний дэргэд байрлуулсан хүүхдийн барималыг НЗДТГ-аас албадан шилжүүлэхээр болсныг мэдэгдлээ. Тодруулбал, НИТХ-ын Тэргүүлэгчдийн 2010 оны гуравдугаар сарын 31-ний өдрийн 55 дугаар тогтоолоор Улсын нийслэлд хөшөө, дурсгал хүндэтгэлийн самбар байрлуулах журмыг баталсан байдаг. Үүнд, “Тухайн улс орон, бүс нутгийн соёл урлаг, түүхэн үйл явдлыг харуулсан, оюун сэтгэлгээний хөгжлийн илэрхийлэл болсон, архитектур, дүрслэх урлагийн шийдэл бүхий байгууламжийг хөшөө” гэж нэрлэхээр тусгажээ. Тэгвэл Сүхбаатар дүүргийн 1 дүгээр хороонд төр, нийгмийн нэрт зүтгэлтэн С.Зориг агсны хөшөөний дэргэд холбогдох байгууллагуудын зөвшөөрөлгүйгээр хүүхдийн хөшөө байрлуулсан байна. Түүнчлэн нэрт яруу найрагч Д.Нацагдорж, Б.Явуухулангийн хөшөөний дэргэд мөн зөвшөөрөлгүйгээр хүүхдийн хөшөө байрлуулжээ.
Энэ нь Улсын нийслэлд хөшөө, дурсгал хүндэтгэлийн самбар байрлуулах журмын 2.1, 2.2 заалтыг тус тус зөрчсөн тул дээрх зөвшөөрөлгүй хөшөөнүүдийг албадан шилжүүлэхийг холбогдох газруудад мэдэгдээд байна.
Улсын нийслэлд хөшөө, дурсгал хүндэтгэлийн самбар байрлуулах журмын дараах заалтыг тус тус зөрчжээ.
2.1 Нийслэлийн нутаг дэвсгэрт хөшөө, дурсгал хүндэтгэлийн самбар байрлуулах саналыг яам, тусгай газар, нийслэл, дүүргийн Засаг даргын Тамгын газар, аж ахуйн нэгж, нам, олон нийтийн байгууллага, иргэдээс албан бичгээр комисст гаргана.
2.2 Нийслэлийн Иргэдийн Төлөөлөгчдийн Хурлын Тэргүүлэгчдийн дэргэд комисс (цаашид "Комисс” гэх) ажиллаж, нийслэлийн нутаг дэвсгэрт хөшөө дурсгал, түүх соёлын үл хөдлөх дурсгалт зүйлийн загвар батлах асуудлыг хэлэлцэн санал боловсруулж, Нийслэлийн Иргэдийн Төлөөлөгчдийн Хурлын Тэргүүлэгчдийн хуралдаанаар шийдвэрлүүлнэ.
Энэхүү үйл ажиллагааг "Монос" ХХК хүүхэд, залууст урам зориг өгөх, өмнөх үеийнхнээсээ үлгэр дуурайл авч, эх орондоо хэрэгтэй сайн хүн болохыг уриалах зорилгоор эрхэм хүмүүсийн хүүхэд ахуйн төрхийг харуулсан баримлуудыг бүтээсэн гэж тайлбарлажээ. Тодруулбал, хичээлийн шинэ жилийн нээлтийн өдөр С.Зориг агсны хөшөөний хажууд дүрэмт хувцастай, сууж буй хүүхдийн баримлыг байршуулжээ. Харин уг хүүхдийн баримлыг “Монос” эмийн сангийн “BACK TO SCHOOL 2026” аяны хүрээнд “Эрүүл биед саруул ухаан” уриан дор бүтээсэн аж.
Ингэхдээ холбогдох албаны хүмүүсээс зөвшөөрөл аваагүй бөгөөд уг асуудлыг Нийслэлийн соёл урлагийн газраас шалгаж байгаа юм байна.
°C