Дэлхий нийтийн анхаарлын төвд долоо хоногийн турш байсан Хятадын Комунист Намын 20 дугаар их хурал өнөөдөр өндөрлөнө. Өнгөрсөн долоо хоногийн ням гарагт эхэлсэн тус хурлаар Ши Жиньпин даргыг ХКН-ын Ерөнхий нарийн бичгийн даргаар гурав дахь удаагаа улируулан сонгох хүлээлттэй байна. Тэрбээр мөн 1982 оноос хойш ашиглаж байгаагүй ХКН-ын Төв Хорооны Хурлын Даргаар сонгох магадлал байгаа. Төв Хорооны Хурлын Даргын албан тушаал анх 1945 оны найм дахь АИХ-аар байгуулагдаж, 1982 оны 12 дахь АИХ-аар уг албан тушаалыг Ерөнхий Нарийн Бичиг болгон өөрчилж байсан түүхтэй. Уг албан тушаал нь Мао Зэдуний хашиж байсан хамгийн өндөр албан тушаал байжээ.
Таван жилд нэг удаа болдог тус хуралд 2300 орчим төлөөлөгч Ардын их хурлын ордонд долоо хоног хуралдсан бөгөөд 200 орчим төлөөлөгч Хятадын Комунист намын Төв хорооны гишүүн, 170 орчим төлөөлөгч нөхвөр гишүүнээр сонгогдоно. Үүнээс 25 хүнийг Төв хорооны улс төрийн зөвлөлийн гишүүнээр сонгож, Улс төрийн зөвлөл байнгын гишүүдээ томилдог. Одоогоор Хятадын Комунист намын Улс төрийн төв зөвлөл долоон байнгын гишүүнтэй, үүнд Ши Жиньпин мөн багтдаг. Өөрөөр хэлбэл Хятадын 1.4 тэрбум хүнийг удирдан жолоодох эрх дээрх долоон гишүүнд оршдог гэж хэлж болно.
°C