Монгол Ардын Намын бүлгийн ээлжит хурлаар ипотекийн зээл төлөлтийн асуудлыг хэлэлцжээ. Тодруулбал, Ипотекийн зээл төлөлтийг ирэх долдугаар сарын 1-н хүртэл хойшлуулах асуудал яригдаж байсан. Тэгвэл цаашдаа зээлийг хэвийн олгох үүднээс төлөлтийг хойшлуулахгүй байхаар шийдвэрлэсэнийг МАН-ын бүлгийн дарга Д.Тогтохсүрэн мэдээллээ.
Тэрбээр "Засгийн газар ирэх нэгдүгээр сарын 1-нээс төлөлтийг хэвийн үргэлжлүүлнэ гэх санал оруулж ирсэн. УИХ-ын ажлын хэсэг сунгах тухай асуудлыг нэлээн олон удаа ярьсан. Энэ нь дараа дараагийнхаа зээлэнд сөргөөр нөлөөлж байгаа учраас Засгийн газрын оруулж ирсэн саналаар явуулъя гэж ажлын хэсэг тогтоод, УИХ-д оруулаад, УИХ төрийн мөнгөний бодлогыг батлахдаа ипотекийн зээл төлөлтийг ирэх нэгдүгээр сарын 1-нээс хуучнаар нь буюу төлөө явахаар шийдвэрлэсэн" гэлээ.
Сануулахад, Цар тахлын улмаас эдийн засаг хүндэрсэн тул ипотекийн зээл төлөлтийг хойшлуулах шийдвэрийг УИХ-аас 2019 онд гаргаж байсан юм. Нийтдээ зургаан удаа зээл төлөлтийг хойшлуулсан бөгөөд 80 мянга гаруй иргэн хамрагджээ.
Мөн өнөөдрийн хуралдаанаар уул уурхайн бүтээгдэхүүний гэрээг ил болгох, үнийг нэмэгдүүлэхэд чиглэсэн Уул уурхайн биржийн тухай хуулийг ирэх оны нэгдүгээр сарын 1-ээс өмнө хэлэлцэн батлахаар бүлгийн гишүүд санал нэгдсэн байна.
°C