Өчигдөр буюу арванхоёрдугаар сарын 4-ний ням гарагт иргэд нүүрсний хулгайчдад хариуцлага тооцохыг шаардан төв талбайд жагссан. Гадаа өвлийн температур хасах 16 байгаа ч Төв талбай дээр 5000 орчим хүн цугласан бөгөөд Төрийн ордныг тойрон гороолж шөнийн 23:00 цаг хүртэл тарсангүй. Жагсаалд ирсэн хүмүүсийн ихэнх хувь нь үр, хүүхдүүдийнхээ цаашдын ирээдүйн төлөө тэмцэж буй 40-өөс дээш насныхан байв. Тэд бүх нийтээрээ ажил хаялт зарлаж, томоохон эсэргүүцэл илэрхийлэх ёстой хэмээн уриалсан юм.
Тэгвэл өнөөдөр жагсаал хоёр дахь өдрөө үргэлжилхээр жагсагчид төв талбайд ирээд байна. Өнөөдрийн жагсаалд оюутнууд нэгдэхээр сургуулиасаа чөлөө хүсчээ. Тодруулбал, МУИС-ийн оюутнууд Үндсэн хуулиар олгогдсон “итгэл үнэмшилтэй, үзэл бодлоо чөлөөтэй илэрхийлэх” эрхээ эдэлж, жагсаалд оролцоход чөлөө олгохыг багш нараасаа хүсчээ. Түүнчлэн МУИС-ын оюутнуудаас гадна долоон их дээд сургуулийн оюутнууд жагсаалд оролцохоо мэдэгдсэн байна.
Жагсагчдын зүгээс нүүрсний хулгайчдыг ил тод зарлаж, тэдэнд тохирох ял шийтгэл оноохыг Ерөнхий сайд Л.Оюун-Эрдэнээс шаардсан юм. Мөн Ерөнхийлөгч У.Хүрэлсүхийг уг хэрэгт анхаарал хандуулах ёстой хэмээн үзэж байгаа юм. Мөн Ковид-19 цар тахлаас үүдэн хил гааль хаасантай холбоотойгоор үүссэн бараа бүтээгдэхүүний үнийн өсөлт, цалин бага ч татвар хураамж нэмэгдэж, иргэдийн амьжиргаа өдрөөс өдөрт дордож байгаад бухимдсан иргэд ч жагсаалд. Олноороо оролцож байгаа юм.
°C