Иргэний үнэмлэхний хугацаа нь дуусаагүй иргэд шинэ загварын үнэмлэх заавал авах шаардлагагүй

Улсын бүртгэлийн ерөнхий хуульд нэмэлт, өөрчлөлт оруулах тухай хуулийн төслийг Монгол Улсын Их Хурлын 2022 оны 06 дугаар сарын 03-ны өдрийн чуулганы нэгдсэн хуралдаанаар баталсан. Тус хууль батлагдсанаар:

• хувь хүний мэдээллийн нууцлалыг хадгалах,
• иргэний регистрийн дугаар,
• байнга оршин суугаа газрын хаягийн мэдээлэл зэргийг иргэний үнэмлэхийн санах ойд байршуулж, иргэний талаар ямар нэг мэдээлэл агуулаагүй, дахин давтагдахгүй иргэний бүртгэлийн дугаарыг ил харагдах бичилт хийх, төрийн байгууллагын үйлчилгээг авахад иргэний бүртгэлийн дугаарыг ашиглах боломжтой болсон.

Мөн Монгол Улсын Засгийн газрын 2022 оны 374 дүгээр тогтоолоор Монгол Улсын иргэний үнэмлэхийн тодорхойлолт, загварыг шинэчлэн батлуулсан бөгөөд Улсын бүртгэлийн байгууллагаас 2022 оны 12 дугаар сарын 13-ны өдрөөс эхлэн шинэ загварын иргэний үнэмлэхийн бэлдцэд бичилт хийх ажлыг эхлүүлээд байгаа билээ. 

Тэгвэл иргэн бүр шинэ загварыг заавал авах шаардлагагүй талаар албаны хүн хэвлэлд өгсөн тодруулгадаа дурджээ. Тодруулбал, “Иргэний үнэмлэхийн хуулийн хүчин төгөлдөр хугацаа нь дуусаагүй иргэд заавал шинэ загвараар солиулах шаардлагагүй. Харин өөрийн хүсэлтээр солиулах бол захиалж болно. Ямар тохиолдолд шинэ загвараар олгогдох вэ гэхээр 16 насанд хүрээд шинээр захиалах, эсвэл 25, 45 насанд сунгуулах, хаяж үрэгдүүлсэн үед шинэ загварын иргэний үнэмлэх олгогдоно. Үнэ өөрчлөгдөөгүй” гэжээ.