УИХ дахь Хөгжлийн Банкны хянан шалгах түр хорооноос зохион байгуулж буй Нотлох баримтыг шинжлэн судлах сонсгол үргэлжилж байна. Өнөөдрийн сонсголд 15 компанийн зээлтэй холбогдуулан 57 гэрчийг дуудсан юм.Гэвч нэр нөлөө бүхий хүмүүсийн хамаарал бүхий этгээдүүд гэрчийн мэдүүлгээс зайлсхийж, элдэв шалтаг хэлж өнөөдрийн сонсголд ирсэнгүй.
Тухайлбал, ТЕГ-ын дарга асан Д.Гэрэлийн охин Г.Хуланг “Шарын гол” ХК-ийн асуудлаар дуудсан ч гадаадад яваа гэдэг шалтгаан хэлсэн бол УИХ-ын гишүүн Зам, тээврийн хөгжлийн сайд С.Бямбацогтын төрсөн дүү нар ч яг ийм шалтгаанаар сонсголд оролцсонгүй.
Тодруулбал, "Вестерн холд" ХХК-ийн ерөнхий захирал С.Балжинням, "Алтай трест" компанийн гүйцэтгэх захирал С.Баянчулуун нар гадаад яваа гэдэг шалтгаанаар сонсголд ирээгүй юм.
Ташрамд хэлэхэд, Хөгжийн банкнаас олгосон зээлийн өр төлбөрийг барагдуулах зарим арга хэмжээний тухай Засгийн газрын тогтоолын хэрэгжилтийг эрчимжүүлэх үүднээс Нотлох баримтыг шинжлэн судлах сонсгол хоёр дахь өдрөө Төрийн ордноо үргэлжилж байна.
Монгол Улсын Засгийн газар, Сангийн яам болон төрийн холбогдох байгууллагуудтай хамтран чанаргүй зээлийг эргэн төлүүлэх ажлыг үе шаттай хэрэгжүүлсээр байгаа. Товчхондоо, Хөгжлийн банкнаас гарсан зээлүүдийн эргэн төлөлтөд анхаарсны үр дүнд өдгөө 994.7 тэрбум төгрөгийн зээл эргэн төлүүлээд байна.
°C