Туркийн өмнөд Сирийн хойд хэсэгт 7.8 магнитудын хүчтэй газар хөдлөлт даваа гарагт болж тус бүс нутгууд гамшгийн байдалтай байна. Амиа алдагсдын тоо 15 мянгад хүрсэн тухай олон улсын мэдээллийн агентлагууд мэдээлсээр байна. Улмаар олон улсын тусламжийн цуваа Турк улсын зорьж аврах ажиллагаанд дэлхийн олон орны аврагчид оролцож байгаа юм. Тэгвэл хөрш зэргэлдээ Сири улсад байдал арай өөр байгаа талаар Сирийн сайн дурын ажилтнууд болон улс төрийн идэвхтнүүд хэлж байна.
Олон жил үргэлжилж буй иргэний дайны улмаас АНУ болон барууны орнуудын хоригт орсон Сири улсад шууд туслах боломжгүй тул олон улсын тусламж одоог хүртэл Сирид очоогүй байгаа юм. Дэлхийн өнцөг булан бүрээс аврах баг, сайн дурынхан Туркт ирсээр байхад адилхан газар хөдлөлтөд нэрвэгдсэн Сири улс олон улсын тусламжгүйгээр дангаараа гамшигтай тэмцэж байгаа нь шудрага бус гэж Сирийн эрүүл мэндийн сайн дурын ажилтан хурцаар шүүмжиллээ. Сайн дурын ажилтнууд НҮБ-аар дамжуулан яаралтай тусламж илгээхийг дэлхий нийтэд уриалж байна.
Одоогоор Европын холбоо 3.5 сая еврог Сирийн засгийн газар болон босогчдын хяналтад байгаа бүс нутагт тусламж болгон олгохоор шийдвэрлэсэн байна. Түүнчлэн НҮБ газар хөдлөлтөд ихээр нэрвэгдсэн Сирийн босогчдын хяналтад байгаа баруун хойд нутагт тусламж оруулах бүх арга замыг судалж байгаагаа мэдэгдсэн.
°C