Израилын "Stakeholder Foods" компани дэлхийд анх удаа “3D” хэвлэх технологийг ашиглан загасны мах бүтээсэн байна. Уг компани нь лабораторийн нөхцөлд хиймэл мах бэлтгэх чиглэлээр мэргэшсэн юм.
Израилын Ерөнхий сайд Биньямин Нетаньяху Реховот хотод орших тус компанийн үйлдвэрлэлийн талбарт лхагва гарагт зочилж, шинэлэг бүтээгдэхүүнийг амталж үзсэн талаар түүний ажлын алба мэдээлсэн байна.
“Stakeholder Foods” нь мал нядлахгүйгээр лабораторид жинхэнэ махан бүтээгдэхүүн бэлтгэж байна. "Өнөөдөр дэлхийд анх удаа тус компани загасны махны үйлдвэрлэлд “3D-принтер” ашиглаж эхэллээ. Ерөнхий сайд лабораторийн нөхцөлд бэлтгэсэн загасны махыг амталж, төрөл бүрийн принтерийг үзэж сонирхлоо" гэж түүний ажлын албанаас мэдээлжээ.
Тус компанид зочлох үеэрээ Б.Нетаньяху "дэлхий даяар хүнсний үйлдвэрлэлд хувьсгал өрнөж байгаа бөгөөд Израил бол хиймэл мах ургуулах чиглэлээр судалгаа, бизнесээрээ дэлхийд тэргүүлэгч улс" хэмээн онцлон тэмдэглэсэн байна.
Тэр үргэлжлүүлэн, Израилын Засгийн газар нь компаниуд бизнесээ урагшлуулах, технологийн манлайллаа хадгалах, хөгжүүлэхэд тусалж дэмжихээр ажиллаж байна гэжээ.
°C